डिसेंबर 2, 2016
निवृत्तीनंतर मी गावी जाऊन राहणार आहे; माझ्या मुलीला मी डॉक्टर बनवणार आहे; येत्या तीन वर्षांत युरोप फिरून येण्याचा विचार करतोय; पुढल्या वर्षी तुझा वाढदिवस येईल तेव्हा जेवायला हॉटेलात जाऊ या; उद्या मी लवकर घरी येणार आहे ... आपल्यापैकी प्रत्येकजण अमरत्वाचा पट्टा घेऊन आल्याप्रमाणे वागत असतो. आयुष्याचा बुद्धिबळाचा डाव आपण 'नियती' ह्या अपराजित खेळाडूबरोबर खेळत आहोत हेच विसरत असतो ...
समोरची ती वयस्क बाई सांगत होती नवऱ्याला
किती दिसांनी भेटेल आता आपला मुलगा आपल्याला
इतके दिवस तिकडे राहिला कसा असेल तो दिसत
आवाज आला मला कुणीतरी होतं छद्मी हसत
वेटिंगरूमच्या फोनवरती लागला एकजण ओरडायला
पोहोचतोच आहे थोड्या वेळात पाहून घेतो तुम्हाला
पैसे तयार ठेवा नाहीतर नाही तुम्ही वाचत
आवाज आला मला कुणीतरी होतं छद्मी हसत
नोव्हेंबर 18, 2016
मानवाला आपल्या प्रगतीचा फार अभिमान आहे. आपल्या बुद्धीच्या जोरावर तो साऱ्या जीवसृष्टीचा अनभिषिक्त सम्राट बनला आहे. मात्र ज्या जीवसृष्टीवर मानव आपली सत्ता गाजवत आहे तिचं अस्तित्व हा ब्रह्माण्डातील केवळ एक अपघात आहे. सुईच्या अग्रावर तोलल्याप्रमाणे उभा असलेला हा डोलारा एका साध्या करणानेही कोसळू शकतो हे विसरून चालणार नाही ...
हद्द पृथ्वीची ओलांडुनिया कक्षा तुम्ही विस्तारा
कळेल केवळ नशीब चांगले जीवन येण्या आकारा
ठाऊक जे ब्रह्माण्ड जेवढे नाही कुणीही शेजारा
ठिपक्याइतुकी पृथ्वी आपुली त्यात पसारा हा सारा
अनंत साऱ्या विस्तारातील अंशच केवळ ज्ञात
जीवन आहे ब्रह्माण्डाच्या खेळातील अपघात
ऑक्टोबर 21, 2016
प्रेमात पडताना 'पडणं' हे क्रियापद तोंडघशी पडणं ह्या अर्थाचंही ठरू शकतं ह्याचं भान ठेवावं लागतं. पण अनुभवावरून शिकता आलं तर ते प्रेम कसलं. तिथे 'पुढच्यास ठेच मागचा पडला' असं होण्याची शक्यता जास्त असते . . .
दिसली कोपऱ्यात दूर
आपल्याच कामात चूर
पहिल्यांदा ती मला
कोणाच्या ना अध्यात
आणि नाही मध्यात
म्हटलं बोलू चला
ऑफिसमधले सारे
राहती दूर बिचारे
तिची वाटते भीती
मोठी वयाने जरी
मनोमनी तिजवरी
जडली माझी प्रीती
ऑक्टोबर 7, 2016
चपलाही न घालता खेळणं, घरी टीवी, फोन, फ्रिज नसणं, स्टेशनवरील नळातून पाणी पिणं अशा मागील पिढीने अनुभवलेल्या गोष्टी नवीन पिढीला सुरस आणि चमत्कारिक कथांप्रमाणे भासतात. आता जमाना डिजिटल फोटोग्राफीचा आहे. जुनी पिढी केवळ अल्बममध्ये चिकटवून पिवळ्या पडलेल्या फोटोंमध्ये बंदिस्त आहे ...
घरी नोकर चाकर नव्हते उगीच उठता बसता
आपणच पिटाळले जायचो काही आणायचं असता
आईवडिलांनी चोपलं घरी कुरवाळायची आजी
शोधलीच नव्हती कोणी तोवर चाईल्ड सायकॉलॉजी
वाचन भरपूर गोट्या चिंगी फास्टर फेणे खास
मिळे बघायला टीवी तेव्हा फक्त दोन तास
कोणत्याच घरी नव्हता तेव्हा साधा काळा फोन
घरोघरी पण आपली आवड आणि रेडिओ सिलोन
आता वाटतं खरंच का हो आपण असे होतो
जसे पिवळे पडलेले अल्बममधले फोटो
ही कविता यूट्यूबवर https://youtu.be/LZQ4XaMfkME ह्या ठिकाणी ऐकता येईल.सप्टेंबर 16, 2016
अज्ञानी समाजात एखाद्या व्यक्तीला ज्ञानप्राप्ती होते आणि मग ही व्यक्ती अज्ञानाचा अंधःकार दूर कसा करता येईल त्या दृष्टीने प्रयत्न करू लागते. अशा व्यक्तीबाबत सर्वसामान्यांच्या प्रतिक्रिया दोन टोकांच्या असतात. एक तर समाज त्या व्यक्तीला वेडं ठरवतो किंवा देवत्व देतो. दोन्ही बाबतीत त्या व्यक्तीचे विचार समजून घेण्याची जबाबदारी मग समाजाची राहत नाही. मग हा समाज माणसांचा असो नाहीतर मुंग्यांचा ...
ओसाड होती जागा तेथे होते एक वारूळ
शिरले होते त्या मुंग्यांच्या डोक्यात एक खूळ
वारुळाच्या बाहेर नजरेस लाल गोळा पडे
हलत होता परत परत उजवी डावीकडे
एकाच रेषेत दिसू शकायची त्यांना सारी सृष्टी
मुंग्यांच्या त्या समुहा होती एकमितीय दृष्टी
सप्टेंबर 2, 2016
खुल्या अर्थव्यवस्थेमुळे नव्या पिढीकरता कारकिर्दीची अनेक दालनं उघडत आहेत. शिक्षण आणि नोकऱ्यांचे सरधोपट मार्ग बदलत चालले आहेत. हे नवीन मार्ग निवडण्याकरता घरापासून दूर जाणं हे आता अपवादात्मक राहिलेलं नाही. एक किंवा दोनच मुलं आणि तीही परगावी / परदेशी स्थायिक होणं हे अनेक मध्यमवर्गीय घरांचं आजचं वास्तव आहे. अशा घरांनी बनलेली ही अशीच एक इमारत ...
नवीन पिढीच्या पंखांत आता उसळत होती वीज
खुणवत होतं त्यांना रोज एक नवं क्षितिज
किती दिवस त्या इमारतीच्या भिंती त्यांना ठेवणार होत्या धरून
एक एक करत सारी पिल्लं घरट्यांतून गेली उडून
उभी होती त्यांच्या बालपणीच्या स्मृती गोंजारत
अशीच एक इमारत
ही कविता यूट्यूबवर https://youtu.be/0zKQHfoncWs ह्या ठिकाणी ऐकता येईल.ऑगस्ट 19, 2016
काल गुलज़ारजींचा वाढदिवस होता. त्यांना वाढदिवसाच्या हार्दिक शुभेच्छा. काही दिवसांपूर्वी त्यांचा कवितासंग्रह वाचायचा योग आला. त्यांच्या कविता वाचून माझ्या मनात आलेले हे काही विचार ... गुलज़ारजी, तुमचं कवितांचं पुस्तक वाचलं कडक उन्हाचे चटके अवचित आलेल्या सरी ... जणू श्रावण आला ओठांच्या कडांना हसू डोळ्यांच्या कडांना पाणी ... एकाच वेळी अतिभव्य ब्रह्माण्डाएवढं सामावणारं एका सूक्ष्म कणात शब्दांना एवढं वजन असतं ... ठाऊक नव्हतं शब्दांना रंग आकार स्पर्श असतो ... ठाऊक नव्हतं शब्दांत भावना व्यक्त करता येतात, ठीक आहे शब्द श्वास घेतात ... ठाऊक नव्हतं
जुलै 22, 2016
वाढती वयोमर्यादा आणि आण्विक कुटुंबसंस्था ह्यामुळे वार्धक्याचा सामना कसा करायचा हा प्रश्न भेडसावू लागला आहे. जात्यातल्यांना भरडताना पाहून आता सुपातलेही चिंतातुर होऊ लागले आहेत. स्वाभिमानाने आयुष्य जगल्यामुळे म्हातारपणी आपण कोणावर ओझं तर बनणार नाही ना हा विचार चाळिशीतच त्रास देऊ लागला आहे. मात्र काही बाबतीत अति स्वाभिमान दाखवणंही चुकीचं ठरू शकतं...
झाले पाऊणशे वयमान
नेहेमी ताठ ठेविली मान
केला नाही सहन कोणता
आयुष्यात कधी अपमान
माझा मित्र मला भेटला
तो वृद्धाश्रम संस्थेतला
जाऊन राहीन त्या संस्थेत
माझा निर्णय मी घेतला
मनात दाटे औदासिन्य
मन तरी वागते अहंमन्य
इकडे आड विहीर अन् तिकडे
नव्हता विकल्प कुठला अन्य
जून 17, 2016
माकडापासून मानव उत्क्रांत होताना शेपटी हा शरीराचा एक अवयव गेला पण व्यसन हा मनाचा एक अवयव मात्र चिकटला. बढाईखोरांचं "मला सुपारीच्या खांडाचंही व्यसन नाही." इथपासून "मी WhatsApp दिवसातून फक्त तीनदाच check करतो." इथपर्यंत स्थित्यंतर आपण बघितलं आहे. सर्व व्यसनांपासून मुक्ती ही एक अद्भुतरम्य कल्पना आहे. व्यसनामुळे आपल्याला आनंद मिळत असताना दुसऱ्यांना त्रास होऊ नये एवढी काळजी मात्र नक्कीच घेता येईल...
व्यसन नावाच्या सापळ्याचे
असतात खूप प्रकार
बाहेरख्यालीपणापासून
सिगरेट दारू जुगार
व्यसन कॉम्प्युटरचं असलं
तहान नाही भूक
माणसं झाली बेटं
कारण नाती झाली मूक
जून 3, 2016
सध्या प्रसारमाध्यमांचं युग सुरु आहे. टीवी, व्हॉट्सॲप, फेसबुक वगैरे माध्यमांवर अनेक प्रश्नांबाबत तावातावाने चर्चा चाललेली असते. प्रत्येकाकडे प्रत्येक प्रश्नाचं काही ना काही उत्तर असतं. आणि तरीही काही प्रश्न सोपी उत्तरं न दिल्याने कठीण होऊन बसलेले आहेत. मला पडलेले असेच काही 'कठीण' प्रश्न... माझ्या मनात काही प्रश्न आहेत मोठे रास्त उत्तर ज्यांचं मिळणं मोठं झालंय दुरापास्त विडी सिगारेट आरोग्याला अपायकारक फार कानीकपाळी ओरडून सांगे आपल्याला सरकार तंबाखूचा उद्यम कैसा चाले मग निर्धास्त उत्तर ज्यांचं मिळणं मोठं झालंय दुरापास्त
एप्रिल 4, 2016
माणूस समूहात राहणारा प्राणी असल्यामुळे बरेचदा त्याच्याकरता मुंग्या, पक्षी, मासे अशा समूहात राहणाऱ्या प्राण्यांची उपमा वापरली जाते. मात्र माणूस हा ह्या इतर प्राण्यांपेक्षा सर्वस्वी भिन्न प्राणी आहे. प्रत्येक माणसाला स्वतःच्या स्वतंत्र व्यक्तिमत्वाची जाणीव असते. त्यामुळे माणसाकरता आपल्या समूहाच्या संरक्षणाएवढंच स्वतःचं वैयक्तिक संरक्षणही महत्वाचं असतं...
तुझ्यात विचार करण्याची क्षमता आहे
तुझ्यात निर्णय घेण्याची क्षमता आहे
पृथ्वीवरील जीवसृष्टी पुढे नेणं हे तुझं लक्ष्य नव्हे
तुझं जगणं केवळ भक्षक किंवा केवळ भक्ष्य नव्हे
तू आहेस तोवर ब्रह्मांड आहे
तुझं एकच आयुष्य आहे
काळजी घे
मार्च 18, 2016
तीन खोल्यांच्या घरात राहणाऱ्या बऱ्याच जणांना चार खोल्यांच्या घराची आस असते. त्याच वेळी काही जण दोन खोल्यांच्या घरातही सुखाने नांदतात. असण्या / नसण्याच्या प्रत्येक पायरीवर आपल्याला हा विसंवाद दिसून येतो. ह्याला कारण म्हणजे आपण बहुतेक सगळेच 'नव्याण्णववासी' आहोत . . . राजा होता एक स्वामींपाशी आला होता मोठा नेक पण दुःखी होता झाला माझ्यापाशी छान सुखसंपत्ती सारी तरीही समाधान नाही मनाच्या दारी स्वामी थोडे हसले हळूच आपुल्या गाली राजासमोर बसले नजर तयाच्या भाळी चिंता तुझ्या मनाशी आहे त्याच्या मागे तू नव्याण्णववासी कारण आहे साधे