वस्तू असो वा वास्तू थांबे तेव्हा मी ती बनता
मी तर अभियंता ॥

वाया जाता काही
मजला आवडत नाही
सृजनाचा आदर
वसतो माझ्या ठायी

संसाधने वापरीन पुरवून दुष्ट अपव्यय टळता
मी तर अभियंता ॥

कामगार किसान
कारकून जवान
मी केलेल्या वस्तूंचे
सर्वांच्या हाती स्थान

नांगर, बंदूक, बोरू, हातोडा वापर करते जनता
मी तर अभियंता ॥

भ्रमणध्वनी हातात
विमान आकाशात
क्रांती संगणकाची
आणली मी झोकात

अडवू शकत नाही मजला ती विषयाची कठीणता
मी तर अभियंता ॥

अंतराळातील यानी
आणि रक्तवाहिनी
मी तेथे पोहोचतो
बंधन नाही मनी

रोखण्यास मजला निष्प्रभ तो विरळपणा वा घनता
मी तर अभियंता ॥

वापरूनी विज्ञान
घडवीन तंत्रज्ञान
मानवजातीकरता
सुखाचे जीवनमान

अडचण कुठली येता सोडा माझ्या हाती चिंता
मी तर अभियंता ॥

दूर सारते भ्रांती
औद्योगिक ती क्रांती
माझ्यामुळेच युद्ध जरी
तरी माझ्यामुळेच शांती

मी केवळ साहित्य बनवतो नाही कुणाशी तंटा
मी तर अभियंता ॥

मी आहे विचारी
ना भावनांच्या आहारी
औषध द्यावे आधी पडता
व्यक्ती कुणी आजारी

चिंतन माझे स्पष्ट टाळुनी भावुकतेचा गुंता
मी तर अभियंता ॥

सडेतोड स्वभाव
अंधश्रद्धा अभाव
चमत्कारा नकार
दिसे कार्यकारणभाव

प्रयोगाअंती सिद्ध घटनेस मी देई मान्यता
मी तर अभियंता ॥

वस्तू असो वा वास्तू थांबे तेव्हा मी ती बनता
मी तर अभियंता ॥