म्हण हो इथे नको गं सांगू कहाणी मजला
तुजसारखी नको गं हवी तूच राणी मजला ॥

तू फूल अन् भ्रमर मी तुजसाठी जन्म माझा
मधु नाही तर नको गं पाजूस पाणी मजला ॥

तू ज्योत ती दिव्याची मी कृमी एक साधा
अंधारी ह्या नको गं सोडूस रानी मजला ॥

संशयी हृदय म्हणते आहे तुझ्या मनात
दुसरा कुणी नको गं समजू अडाणी मजला ॥

दुसऱ्या कुणाहीसाठी त्यागेन प्रीत माझी
इतुकाही तू नको गं समजूस दानी मजला ॥

देणार तर दिलाचा दे मला चेक कोरा
भिक्षेत तू नको गं देऊस नाणी मजला ॥

मनी तुझ्या कोपऱ्यात माझेही स्थान आहे
फसवू आता नको गं तुजलाही आणि मजला ॥

करणार नाही त्रागा असला जरी नकार
अडखळू तू नको गं ऐकू दे कानी मजला ॥

ठेवीन जपून काही एक स्मित एक स्पर्श
थांबू आता नको गं दे तू निशाणी मजला ॥

जे चालले मनात ते तुझे तुला ठावे
चुकूनही पण नको गं म्हणू बेईमानी मजला ॥

म्हण हो इथे नको गं सांगू कहाणी मजला
तुजसारखी नको गं हवी तूच राणी मजला ॥