इथेच जगायचंय इथेच मरायचंय
जे काही करायचंय इथेच करायचंय ॥

मैत्रीचं ते खातं तुझ्यासंगे राहातं
प्रत्येकाशी नातं इथेच जपायचंय ॥

सात जन्म सोड तार मनाची जोड
नातं कर गोड इथेच नांदायचंय ॥

आनंदाचं भान प्रत्येक कामात जाण
नशिबाचं जे दान इथेच पडायचंय ॥

आहेस नशीबवान क्षणिक तुझं स्थान
जन्माचं हे वाण इथेच लुटायचंय ॥

कुणास नको त्रास मदतही केल्यास
स्वार्थ हाच ध्यास इथेच निवडायचंय ॥

किती धडपडशील किती झगडशील
जे काही कमावशील इथेच ठेवायचंय ॥

काही करण्यात धर्म काहीत अधर्म
करशील जे कर्म इथेच भोगायचंय ॥

पापाचा घडा फुटला गंगेमध्ये धुतला
जन्म नाही पुढला इथेच संपायचंय ॥

वस्तू आणि पैसा किती जोडशील ऐसा
प्राण जाईल जैसा इथेच सोडायचंय ॥

इथेच जगायचंय इथेच मरायचंय
जे काही करायचंय इथेच करायचंय ॥