एका मोठ्या कंपनीची ही बातमी आहे आतली
त्या कंपनीच्या एका एम्प्लॉयाला सापडली एक चमत्कारी बाटली ॥

आतून एक राक्षस निघाला उघडताच झाकण
म्हणाला कैक युगं करत होतो मी ह्या बाटलीची राखण ॥

काम करण्याचा माझा अचाट आहे आवाका
कोणतंही आणि कितीही काम सांगा फक्त एक नियम याद राखा ॥

मी थकत नाही ना कंटाळत ना झोप मला ना भूक
कामाशिवाय मला ठेवण्याची मात्र तू कधीही करू नकोस चूक ॥

एम्प्लॉयाने दिली त्याला ढीगभर कामं घरची
तयार करून ठेवली आणखीन शंभर कामं दारची ॥

राक्षस पटापट कामाला लागला ना कंटाळला ना थांबला
पुढची कामं दे म्हणून थोड्याच वेळात पुन्हा उभा ठाकला ॥

एम्प्लॉयी धावत गेला बॉसकडे दाखवायला तो राक्षस
बॉसही झाला खूश दिला एम्प्लॉयाला चांगला रग्गड बोनस ॥

कंपनी होती तशी छोटी पण महत्वाकांक्षा होती भारी
काबीज करायची होती कंपनीला जगातील मार्केटं सारी ॥

बॉस म्हणाला राक्षसाला, मित्रा, असा काहीतरी कर खेळ
आमच्या कस्टमर्सना आमच्या पोर्टलवर घालवावासा वाटेल दुप्पट वेळ ॥

राक्षस लागला कामाला त्याची क्षमता होती असीम
धडाधड शोधून तो लोकांना पाठवू लागला विडिओ आणि मीम ॥

लोकांच्या चागलंच पचनी पडलं राक्षसाचं ते तर्कट
आणि बघता बघता कंपनीचा धंदा झाला दुप्पट ॥

बॉस हुरळला मनात तरी त्याचं झालं नव्हतं समाधान
राक्षसाला म्हणाला, भले बहाद्दर! आणखीन आण आणखीन आण ॥

राक्षसाने तोवर जाणली होती मानवी मनाची खोड
हिंसा आणि विध्वंस पाहण्याची असते मानवी मनाला ओढ ॥

हिंसक आणि विध्वंसक कंटेंट पोर्टलवर दिसू लागला
आणि पोर्टलच्या कस्टमर्सचा आकडा भराभर वाढू लागला ॥

बॉसला जणू हर्षवायू झाला दिसू लागला प्रॉफिट भरघोस
राक्षसाला म्हणाला, तू काय, अरे मीच तुला सांगतो, आता थांबू नकोस ॥

अनुभवातून राक्षसाला मिळाली होती मानवी मनाची आणखीन एक चावी
प्रत्येकाच्या मनात होता शत्रू एक मायावी ॥

आपल्या दुःखाकरता जो तो देई दुसऱ्या कुणाला दोष
कुणाचा दुसऱ्या जाती, धर्मावर तर कुणाचा भाषा, प्रांतावर रोष ॥

ज्याला ज्यात असुरी आनंद तेच लागलं दिसू
राक्षसाने असा विखारी कंटेंट बनवला की वातावरण लागलं नासू ॥

राक्षस स्वतः कोणाचीच घेत नव्हता बाजू
पण ज्याला जे हवंय ते देऊन कंपनीची मात्र पोळी लागला भाजू ॥

पोर्टल बघताना कामाची पर्वा राहिली नाही कुणाला
आणि इथे कंपनीच्या शेअर्सचे भाव मात्र भिडू लागले गगनाला ॥

एकमेकांशी वाद घालून दुरावू लागले बालपणीचे मित्र
अहो एकाच कुटुंबातील सदस्यांमध्येही हेच दिसू लागलं चित्र ॥

कुणाचं काही बिघडलं नसतं जर ही गोष्ट इथे थांबली असती फक्त
पण कंपनीने खतपाणी घातलेल्या हिंसेमुळे आता रस्त्यावरही सांडू लागलं रक्त ॥

देशोदेशीच्या सरकारांनी मग कंपनीच्या बॉसचे कान टोचले
त्याने मात्र मी त्या गावचाच नाही म्हणून कानावर हात ठेवले ॥

म्हणाला मी तर फक्त धंदा वाढवत होतो त्यात काय गैर
मी राक्षसाला कधीच सांगितलं नाही वाढव हिंसा आणि वैर ॥

मानवतेला काळिमा मानवांनीच फासला नाही काय
राक्षस तर मानवच नाही मग त्याला त्याचं काय ॥

राक्षस आपले जे विचार तेच आपल्याला दाखवतो
आपण मग दुसरी बाजू विचारात न घेता तेच विचार नाचवतो ॥

बाटलीतला राक्षस कदाचित पुन्हा बाटलीत जाऊन बसेल
आपल्या मनातल्या राक्षसावर मात्र सांगा उपाय कोण करेल ॥