टेबलावरती ठेवली होती बाटली थंडगार
मास्तरांनी घेतले पाणी घोट दोन चार
शर्ट पॅन्टचे खिसे अचानक तपासून ते बघती
पाकीट विसरून आले होते विसरभोळे फार

स्वच्छ मराठी प्रसंग सारा निरखून पाहाल तर
इंग्रजीचे शब्द तुम्हाला दिसतील मग भरभर
टेबल बाटली मास्तर शर्ट पॅन्ट आणि पाकीट
भाषेमध्ये आपल्या चपखल करून बसले घर

कळत नकळत केव्हा आली समजत नाही कैशी
आपल्या घरात ठाण मांडुनी बसली परकी मावशी || १ ||

स्वातंत्य्राच्या पूर्वी जेव्हा राज्य होतं परकं
इथल्या आपल्या भाषांचंही स्थान होतं हलकं
स्वतंत्र झाला भारत तरीही मायबोलीकडे
सरकार दरबारीही अजून पाहिलं जातं तिरकं

माध्यम घेतलं इंग्रजी तर कच्चा राही पाया
शिक्षण घेतलं मराठीमध्ये सारंच जार्इ वाया
साधे साधे शब्द मराठी कळत आता नाहीत
डॅडी झाले बाबा आणि मम्मी झाल्या आया

आपली भाषा विसरून जाती पडले सारे फशी
आपल्या घरात ठाण मांडुनी बसली परकी मावशी || २ ||

आधीच आपल्या घरात आहेत आपल्या कित्येक मावशा
देशामध्ये आहेत जितके प्रांत तितक्या भाषा
मातॄभाषा राष्ट्रभाषा कमी आहेत म्हणून
लागे आत्मसात करावी आणखीन परकी भाषा

मान्य आहे भाषा असतं संवादाचं साधन
भेसळ त्यात झाली तरीही कळतं तुमचं भाषण
ह्मा न्यायाने पोळी भाजी हवी कशाला रोज
पोट भरेल रोज भेळ शेवपुरीचं जेवण

दिवसेंदिवस होत आहे इंग्रजीची सरशी
आपल्या घरात ठाण मांडुनी बसली परकी मावशी || ३ ||

फायदा झाला आहे आपला ह्मात नाही वाद
आपल्या इंग्रजीला मिळते परदेशीही दाद
इंग्रजीच पण बनली आहे विद्येचे परिमाण
आपलीच भाषा विसरून जायचा घडतो पाहा प्रमाद

नवीन कुठली भाषा शिकणं काहीच नाही गैर
प्रेम मराठीवरी म्हणजे दुसऱ्यांशी ना वैर
साऱ्या भाषा समर्थ असती आपल्या आपल्या जागी
पण इंग्रजीचा वापर आवरा झाला आहे स्वैर

बाकी देशांत परकी भाषा शिकतो मनुष्य हौशी
आपल्या घरात ठाण मांडुनी बसली परकी मावशी || ४ ||

परक्या मावशीस आपणही पण थोडंसं फसवलं
झगा लावला बदलायला अन् पातळच नेसवलं
जंगल बाजार लूट गुरू देऊन ऐसे शब्द
देशी अलंकार घालुनी तिजला छान सजवलं

नक्की कुठली भाषा आपुली इंग्रज आता फसेल
थडग्यामध्ये आपल्या शेक्सपिअर रडत असेल
भविष्यकाळी देशी इंग्रजी जगभर बोलली जार्इल
मुळ इंग्रजी कोणती पत्ता कोणालाच नसेल

परकी मावशी घरची झाली आर्इ कशी विसरशी
आपल्या घरात ठाण मांडुनी बसली परकी मावशी || ५ ||