मुहूर्त शोधत असशील चांगलं करण्याकरता काही
तर आजच्यासारखा दिवस शोधून सापडणार नाही ॥
जिभेवर नाही ताबा रोज वाढत चाललंय वजन
सोप्पं आहे म्हणत म्हणत सुटत नाही व्यसन
फेक सिगरेट उठ लवकर चालण्याकरता पायी
आजच्यासारखा दिवस शोधून सापडणार नाही ॥
गायन वादन चित्रकलेने मिळे किती आनंद
आयुष्यात एक चांगला जोपासायचाय छंद
काढ गिटार, कॅन्वास, ब्रश मागे सारून बाही
आजच्यासारखा दिवस शोधून सापडणार नाही ॥
मैत्रिणीला फोन करायचा राहून गेला पाहा
मित्राशी त्या भांडून बघ वर्षं झाली सहा
फोन सोड भेटूनच ये कर आता घाई
आजच्यासारखा दिवस शोधून सापडणार नाही ॥