आयुष्यात विलक्षण काही घडलं नाही बुवा
देवावाचून कधी काही अडलं नाही बुवा ॥
बालपणातच लागली होती विज्ञानाची गोडी
विज्ञानानेच सोडवली ती बालपणीची कोडी
चमत्काराचं वेड कधी जडलं नाही बुवा
देवावाचून कधी काही अडलं नाही बुवा ॥
परीक्षेत कधी चांगली कधी वाईट आली वेळ
कधी झालो पास कधी नापासाचा खेळ
नवसावाचून शिक्षण काही रखडलं नाही बुवा
देवावाचून कधी काही अडलं नाही बुवा ॥
प्रेमामध्ये पडत होतो मुलीच्या प्रत्येक
नाही म्हणाल्या चार शेवटी हो म्हणाली एक
स्वर्गामधल्या गाठींना मी छेडलं नाही बुवा
देवावाचून कधी काही अडलं नाही बुवा ॥
कधी होती चांगली कधी नव्हतीही नोकरी
घरच्यांची अन् शेजाऱ्यांची नजर असे बोचरी
भकास जीवन दारूत कधी बुडलं नाही बुवा
देवावाचून कधी काही अडलं नाही बुवा ॥