माझी काही चूक असेल तर ती सुधारायची संधी तरी होती का?
इतकी कशी रागावलीस
आपल्यात इतकी मैत्री तरी होती का? || धृ ||
काहीतरी खुपत होतं विचार केला दिवस दोन
खरंच खूप दिवसांत तुझा आला नाही साधा फोन
शेवटी कधी बोललो ते आता नक्की आठवत नाही
पण आता वाटतंय तेव्हा आपल्यांत जरूर बिनसलं होतं काही
तेव्हापासूनच बहुदा आपलं बोलणं बंद झालंय
उशिराने असेल पण आता माझ्या लक्षात आलंय
त्या दिवशीच्या माझ्या बोलण्याला इतकी धार तरी होती का?
इतकी कशी रागावलीस
आपल्यात इतकी मैत्री तरी होती का? || १ ||
रोज बोलू असे काही आपल्याकडे फारसे नव्हते विषय
तरी अधूनमधून तुझ्याशी बोलण्याची मला लागली होती सवय
तुझं ऑफिस माझं ऑफिस तुझं घर माझं घर
कधी एखादं पुस्तक एखादा सिनेमा एवढंच बोलायचो फार तर
माझं बोलणं एवढं महत्वाचं वाटत होतं तुला
ह्याचीच मुळात थोडीही जाणीव नव्हती मला
माझ्या बोलण्याला एवढी किंमत तरी होती का?
इतकी कशी रागावलीस
आपल्यात इतकी मैत्री तरी होती का? || २ ||