उशीर जाहला करताना दाढी ।
चुकली गाडी चॉकलेट खावे ॥
कधी ऑफिसला येता लवकर ।
आणुनी रुचकर चॉकलेट खावे ॥ १ ॥
बॉस जाचतो कामाचा भार ।
कुठलाही वार चॉकलेट खावे ॥
होई कौतुक वाढे पगार ।
फेडुनी उधार चॉकलेट खावे ॥ २ ॥
असेल घरी पत्नी कजाग ।
रिचवुनी राग चॉकलेट खावे ॥
पत्नी प्रेमळ रंगली रंगे ।
तिच्याच संगे चॉकलेट खावे ॥ ३ ॥
मुले खट्याळ अभ्यास नाही ।
अंगाची लाही चॉकलेट खावे ॥
मुलांच्या करिता घरी आणुनी ।
हळू चोरुनी चॉकलेट खावे ॥ ४ ॥
खर्च वाढले धन चणचण ।
खर्चुनी पण चॉकलेट खावे ॥
अशी अवचित लागे लॉटरी ।
करण्या साजरी चॉकलेट खावे ॥ ५ ॥
कुठलाही खेळ भारत हरता ।
मॅच सरता चॉकलेट खावे ॥
खेळी कोणत्या जिंके भारत ।
नाच करत चॉकलेट खावे ॥ ६ ॥