दोन खांबांवर आडवा फलक, लांबून दिसत असे प्रवेशद्वार
चार मजली होती तरी ती इमारत होती मोठी टुमदार ॥
प्रयोगशाळा, वाचनालयं, बाक आणि फळे ठेवलेले वर्ग
शाळा कसली तो तर होता मुलांकरता स्वर्ग ॥
शाळेच्या पुढ्यात एक मोठं अंगण होतं पसरलेलं लांबच लांब
अंगणाच्या मध्यभागी चौथऱ्यावर होता एक उंचच उंच खांब ॥
खुलून दिसत होता इमारतीला दिलेला रंग पांढरा आणि निळा
डोळे भरून बघत होतो दिमाखदार अशी ती माझी शाळा ॥
दोन वर्षांपूर्वी आलो तेव्हा इथे होतं नुसतं माळरान
झाडंझुडूपं तोडून आम्ही इथेच बांधली एक झोपडी लहान ॥
सहा वर्षांचा होतो बहुतेक जेव्हा पहिल्यांदा इथेच घेतलं खांद्यावर छोटं पोतं
आईने मोठ्या कौतुकाने मोडली होती कानशिलावर बोटं ॥
आता रोज काम करतो त्याचं कुणी करत नाही कौतुक
मलाही कळलंय काम केलं नाही तर शमेल कशी पोटाची ह्या भूक ॥