चोवीस वर्षे आपल्या मनांत ज्या व्यक्तीने केलंय घर
नाव आहे त्या व्यक्तीचे सचिन रमेश तेंडुलकर || धृ ||
घोळक्यामध्ये उभा होतो रेडिओ लावून कानाला
स्कोर काय विचारत होता प्रत्येक जण आम्हाला
तीस धावा उरल्या होत्या षटके उरली होती तीन
तरीही सारे आशावादी खेळत होता अजून सचिन
पोकळी भरली त्याने जेव्हा पर्व संपले गावस्कर
नाव आहे त्या व्यक्तीचे सचिन रमेश तेंडुलकर || १ ||
ओझे वाहतो अपेक्षांचे शंभर कोटी जनतेचे
भल्याभल्यांना कळले नाही गुपित त्याच्या क्षमतेचे
मुंबर्इ दिल्ली चेन्नर्इ कोलकाता पुणे असो किंवा कोचिन
खेडोपाडी गावोगावी म्हणती तव ‘अपना सचिन’
चैतन्याचे वारे फुंकू शकतो सार्या देशभर
नाव आहे त्या व्यक्तीचे सचिन रमेश तेंडुलकर || २ ||
कितीक आले कितीक गेले केली ज्यांच्याशी तुलना
काळाच्या ओघात निमाले तुझ्या विक्रमांना खळ ना
कसे करावे बाद पडे मग सार्यांना हा प्रश्न कठीण
गोलंदाजांच्या दु:स्वप्नांमध्ये तळपे अजून सचिन
सुवर्णाक्षरी नवे पराक्रम इतिहासाच्या पानांवर
नाव आहे त्या व्यक्तीचे सचिन रमेश तेंडुलकर || ३ ||