त्याच भिंती त्याच खोल्या
त्याच जागा दिसती डोळ्यां

त्या कपाटामागुती शोधी मी जर लपलीस तू
पण तिथे नसणार तू || १ ||

त्याच खुर्च्या तेच टेबल
पुस्तकांवर तेच लेबल

आर्इही चिडणार नाही पसरल्या जर वस्तू तू
पण तिथे नसणार तू || २ ||

तेच पडवळ अन् रताळी
तीच आठी तुझ्या भाळी

गुळाचा तो खडा देता नक्की बघ हसशील तू
पण तिथे नसणार तू || ३ ||

तीच गादी तेच अंथरूण
तीच उशी अन् तेच पांघरूण

सांगण्या तुज ऊठ जार्इन अजून का निजलीस तू
पण तिथे नसणार तू || ४ ||

त्याच चिंता त्याच शंका
छतावरचा तोच पंखा

उशीर झाला म्हणू मैत्रिण जवळची राहिलीस तू
पण तिथे नसणार तू || ५ ||

तोच पाऊस तीच थंडी
लोकरीची तीच बंडी

सालबादाच्याप्रमाणे राहतील बदलत ऋतू
पण तिथे नसणार तू || ६ ||

तेच दसरा अन् दिवाळी
पाडवा तो तीच होळी

करूनी अर्चा वळूनी सांगीन तीर्थ दे सर्वांस तू
पण तिथे नसणार तू || ७ ||

तो दमा अन् तीच धाप
तीच सर्दी तोच ताप

कपाळावर थंड पट्ट्या ठेवण्या यावीस तू
पण तिथे नसणार तू || ८ ||

तीच ही अन् तोच मीही
नाही काही अन् कमीही

आठवणींनी नयन आमुचे सारखे जाती उतू
पण तिथे नसणार तू || ९ ||

तीच जागा तेच घरटे
आज ऐसे स्वल्प ठरते

पंखी बळ जोखुन भरारी गगनी मग घेशील तू
अन् इथे नसणार तू || १० ||