चंदनापरी शीतल मनही दग्ध जाहले
बंधुराज आज असे विरही विद्ध जाहले ॥ धृ ॥
निक्षूनी वदले बंधू सीतेचे कर रक्षण
तरीही ताडता माता सोडिलेच सदन हे
कपटी मारिचाकारण मातेचे होई हरण
ऐसा घडला प्रमाद लपवू कुठे वदन हे
पश्चात्तापात जळत हृदय क्षुब्ध जाहले
बंधुराज आज असे विरही विद्ध जाहले ॥ १ ॥
राम तथा जानकीस दो शरीरे असती जरी
अस्तित्त्वच दोघांचे एकरूप एकसंध
कोसळला वृक्ष जणू वादळात भूवरी
देण्या आधार मात्र असे हा थिटा स्कंध
काय वदू शब्दच हे कंठी रुद्ध जाहले
बंधुराज आज असे विरही विद्ध जाहले ॥ २ ॥
गिळून लाज वदलो चरणासी होऊनी लीन
शोधीन मातेस असे स्वर्ग भूमी पाताळी
दुःख हरुनी तुमचे मी होईन मग स्वाधीन
येऊनी घेईन दंड लिहिला जो ह्या भाळी
ऐकुनी ते अश्रूंनी नयन स्निग्ध जाहले
बंधुराज आज असे विरही विद्ध जाहले ॥ ३ ॥