आल्याचा मंद सुगंध
सुंदर दिसत होता रंग
म्हटलं थोडं आणखीन दुध घालू या
… आणि चहा दुधाळ झाला ॥
स्वयंपाकघरात नुसता घमघमाट
तोंडाला सुटले पाण्याचे पाट
म्हटलं थोडं आणखीन मीठ घालू या
… आणि रस्सा खारट झाला ॥
लोकांचे घसे बसले होते ओरडून
मी बोलरला काढलं होतं चोपून
म्हटलं थोडा आणखीन एक छक्का मारू या
… आणि बाउंड्रीवर कॅच गेला ॥
सहलीत चालली होती टिंगल-टवाळी
हसत होते सारे एकमेकांना देत टाळी
म्हटलं थोडा आणखीन विनोद करू या
… आणि समोरचा दुखावला गेला ॥
मैत्रीचं नातं असं घट्ट
संकटातही उभा राहायचा दत्त
म्हटलं थोडा आणखीन वाद घालू या
… आणि मित्र रुसून गेला ॥