प्रत्येक कायद्याची ज्याने केली पायमल्ली
त्याच्या घरी सुबत्ता नांदतेय अष्टौप्रहर हल्ली
तोच पुन्हा वळून माझी चेष्टा करतो
कारण
कायदा पाळणाराच शेवटी गाढव ठरतो || १ ||

कधीच पाळत नाही तो लाल दिव्याचा नियम
चुकीच्या बाजून गाडी पुढे काढतो कायम
घरी पोहोचण्याची शर्यत मग नेहेमी मीच हरतो
कारण
कायदा पाळणाराच शेवटी गाढव ठरतो || २ ||

पगार घेताना निम्मे पैसे मागतो रोकडे
आयकर भरताना दाखवतो उत्पन्न तोकडे
तेवढेच उत्पन्न पण मी दुप्पट कर भरतो
कारण
कायदा पाळणाराच शेवटी गाढव ठरतो || ३ ||

नव्वद दिवसांचे मी मोजतो क्षणन् क्षण
तो मात्र दलालाकरवी करतो आरक्षण
मी अनारक्षित आणि तो बर्थवर पाय पसरतो
कारण
कायदा पाळणाराच शेवटी गाढव ठरतो || ४ ||

आयुष्यभर झुरतोय घ्यायला घर मोठं
त्याने मात्र खोली बांधली जिथे अंगण होतं
तरीही घरपपट्टीला उशीर झाला तर मीच घाबरतो
कारण
कायदा पाळणाराच शेवटी गाढव ठरतो || ५ ||

स्वस्त वस्तूंची दुकाने त्याला ठाऊक आहेत
मी मात्र पावतीशिवाय वस्तूच नाही घेत
माझ्यापेक्षा मोठा टीवी त्याच्याकडे अवतरतो
कारण
कायदा पाळणाराच शेवटी गाढव ठरतो || ६ ||

लहानपणापासून ऐकत आलो आहे बात
कायद्याचा म्हणे भारी लांब असतो हात
पण हा हात कायदा मोडणाऱ्यांना कधी धरतो
कारण
कायदा पाळणाराच शेवटी गाढव ठरतो || ७ ||

इंग्रज गेला तरी तेच पोलीस आणि नोरकशाही
कायद्याच्या रक्षकांनाच कायद्याची पर्वा नाही
त्यांना जाब विचारायला तुम्ही आम्ही घाबरतो
कारण
कायदा पाळणाराच शेवटी गाढव ठरतो || ८ ||

कायदा तोडण्याला कारण नसतो नाइलाज
विचार करता आपली आपल्यालाच वाटेल लाज
स्वार्थीपणे जो तो गेंड्याचे कातडे पांघरतो
कारण
कायदा पाळणाराच शेवटी गाढव ठरतो || ९ ||

उफराटेपणा पाहून होतात मनाला क्लेश
वाटतं कुठे चालला आहे आपला देश
मग वाटतं कशाला आणि कोणाकरता आपण झुरतो
कारण
कायदा पाळणाराच शेवटी गाढव ठरतो || १० ||

त्या दिवसावर आहे माझी भिस्त
जेव्हा सर्व जण पाळू लागतील शिस्त
नाही म्हणणार कोणी मी बेकायदेशीर मार्ग आचरतो
तेव्हाच म्हणता येर्इल
कायदा पाळणारा शेवटी गाढव नसतो || ११ ||