दिवस असो वा रात्र असो तो काम करतसे भला
जाता येता नियमित माझी छबी दाखवी मला
माझ्या आयुष्याचा तंतोतंत असा तो ठसा
कुण्या समांतर जगतामध्ये नेर्इ मला आरसा || १ ||
आरशातल्या माझे असते खचितच न्यारे घर
पदर साडीचा पत्नी घेते उलट्या खांद्यावर
माझ्या तुलनेमध्ये त्याचा भांग उलट तो कसा
कुण्या समांतर जगतामध्ये नेर्इ मला आरसा || २ ||
आरशातल्या जगतामध्ये गोष्ट प्रत्येक उलटी
सचिन खेळतो लेफ्टी तेथे लारा पण राइटी
पश्चिम खिडकीमध्ये येतो सकाळचा कवडसा
कुण्या समांतर जगतामध्ये नेर्इ मला आरसा || ३ ||
घड्याळातले पहा तेथल्या उलटे फिरती काटे
फोटोमध्ये आर्इवडिलांची अदलाबदली होते
कडक गणपती उजव्या सोंडेचाही दिसे छानसा
कुण्या समांतर जगतामध्ये नेर्इ मला आरसा || ४ ||