आयुष्य असते फारच मोठे मजला कळून चुकले
आता केस पिकले || धृ ||
फारा वर्षांपूर्वी भारत क्रिकेटमध्ये हरला
वाटे आपला क्रिकेटमधला काळ सुगीचा सरला
काही वर्षांनंतर पुन्हा विश्वविजेता ठरला
समयाचे पारडे फिरूनिया आपल्या बाजूस झुकले
आता केस पिकले || १ ||
नेता एक अडकला करता पैशांचा घोटाळा
छी थू केली लोकांनी अन् चेहेरा केला काळा
विकल्प देतो स्वच्छ सांगूनी पुन्हा निवडून आला
पुन्हा लाच खाऊनी त्याने कितीक पैसे गिळले
आता केस पिकले || २ ||
मित्राच्या साध्या वाक्याने मनास लागे ठेच
अहंकार माझ्या मनातला मुळात कारण हेच
कसे त्यास बोलते करावे आता पडला पेच
अहंपणाहून मैत्री मोठी माझे मन हे शिकले
आता केस पिकले || ३ ||
नकार मिळता तिच्या मुखातून पचला नव्हता धक्का
भीष्मासम ब्रह्मचर्य पाळीन विचार केला पक्का
गृहस्थ पुरता आता शंका नाही एकही टक्का
प्यार मुहोब्बत असली गाणी ऐकून कान किटले
आता केस पिकले || ४ ||