अंगणामध्ये होता भिजून गेलेला एक कुत्रा
बाकी सगळ्या कुत्य्राांपेक्षा लहान आणि भित्रा
बिस्कीट आपल्या हातात घेऊन अंगणात आलीस तू
खायला घालून बोललीस त्याला ये जवळ ये मित्रा

हळुवार ती भावना कधी हरपू नकोस तू
एकच मागणं आहे पुढे बदलू नकोस तू || १ ||

गेलो होतो फिरायाला उशीर झाला खूप
घरी घेतलं तुझ्या पपांनी नरसिंहाचं रूप
मैत्रिणीकडे होते सहज पचली असती थाप
पण खोटं नाही बोललीस ऐकून घेतलंस तू गुपचूप

सत्याची ही कास कधी सोडू नकोस तू
एकच मागणं आहे पुढे बदलू नकोस तू || २ ||

प्रेम केलं होतंस माझ्याआधी कुणावरतरी
मी मागणी घालता गोष्टं सांगून टाकलीस खरी
तुझ्या भावना साऱ्या तुडवून निघून गेला तो
मला म्हणालीस विसरत नाही प्रयत्न केला जरी

माझ्यावरचा विश्वास मोडून देऊ नकोस तू
एकच मागणं आहे पुढे बदलू नकोस तू || ३ ||

भेटतो जेव्हा तुला माझं प्रसन्न होतं मन
असणं तुझं सुवास आणि हसणं सूर्यकिरण
जग वाटतं निर्मळ आणि जगणं वाटतं सोपं
अशक्य गोष्टींवरचं तुटतं अशक्यतेचं बंधन

आयुष्य माझं उजळवणं हे थांबवू नकोस तू
एकच मागणं आहे पुढे बदलू नकोस तू || ४ ||

आयुष्याचा साथीदार निवडलं मी तुजला
तुझ्या माझ्यात आता कुठला दुरावा ना उरला
लग्नानंतर नावही नाही बदलणार मी तुझं
तू आहेस जशी अगदी तशी आवडतेस मला

प्रेम माझं सर्वंकश हे विसरू नकोस तू
एकच मागणं आहे पुढे बदलू नकोस तू || ५ ||