नाही सुटणार आता अबोला
तुम्हा ओळखलंय मी राया
जरी केलीत लाडीगोडी
जरी पडलात माझ्या पाया || धृ ||
पहिल्या दिशी नजर भेटली
जशी आग मनी चेतली
तुमची प्रित अचुक हेरली
तुम्ही तन मी तुमची छाया
तुम्हा ओळखलंय मी राया || १ ||
डोळ्यामध्ये सुरेची झिंग
ओठ डाळिंबीचा रंग
सारं भरलं ज्वानीनं अंग
तरी जाता काम कराया
तुम्हा ओळखलंय मी राया || २ ||
तुम्हासाठी केला शिणगार
वाट बघत झाला अंधार
तुमच्या मनात तिचे विचार
मन धावे तिकडं जाया
तुम्हा ओळखलंय मी राया || ३ ||