सत्याच्या भेटीस एकदा आले पाहा असत्य
रीतीनुसार सत्यही करी असत्याचे अतिथ्य
जुनी गोष्ट आहे तरीही ऐकुनी एकदा पाहा
सत्यामध्ये ह्या गोष्टीच्या लपले मोठे तथ्य ॥
सत्यास म्हणते असत्य आजचा दिन बघ आहे छान
संशयग्रस्त सत्य पण पाहे वरती करुनी मान
सत्यवचन ते बघता सत्याच्या येई लक्षात
हर्षोल्हासी दिसत सृष्टीचे होते पानन् पान ॥
फिरत वनातून आले दोघे असे जेथ पुष्करणी
असत्य म्हणते पाहा किती आल्हाददायी हे पाणी
आशंकित पण सत्य पुन्हा पाही पडताळून सत्य
परंतु भासे खचित असे आल्हाददायी ते चरणी ॥