ओळख तुझी करून घेणं अर्धंच राहून गेलं बघ
चुटपुटत्या त्या भेटीत बोलणं अर्धंच राहून गेलं बघ ॥

कॉफीशॉपच्या टेबलपाशी एकटीच वाचत बसली होतीस
फ्लाईट लेट झालं म्हणून जगावर हिरमुसली होतीस
कुठे जाणार होतीस विचारणं अर्धंच राहून गेलं बघ
चुटपुटत्या त्या भेटीत बोलणं अर्धंच राहून गेलं बघ ॥

जागा नव्हती इतर कुठेच म्हणून तिथे येऊन बसलो
पुस्तकातून वर बघणाऱ्या तुला बघून बळेच हसलो
पुस्तकाचं नाव बघणं अर्धंच राहून गेलं बघ
चुटपुटत्या त्या भेटीत बोलणं अर्धंच राहून गेलं बघ ॥

सुरुवातीचं अवघडलेपण जाऊन मोकळी होत गेलीस
माझ्याही अन् मनातली तू किल्मिषं सारी दूर केलीस
तेवढ्यात तुझं नाव विचारणं अर्धंच राहून गेलं बघ
चुटपुटत्या त्या भेटीत बोलणं अर्धंच राहून गेलं बघ ॥

काय गप्पा मारल्या एवढ्या आठवत नाही जरासुद्धा
गप्पा होत्या अवीट मात्र हाच तर होता खरा मुद्दा
बघत राहणं तुझं हसणं अर्धंच राहून गेलं बघ
चुटपुटत्या त्या भेटीत बोलणं अर्धंच राहून गेलं बघ ॥

भाळावरची एक बट गालावरती येत होती
गालावरच्या खळीपासून लक्ष विचलित करत होती
बट तुझी ती मागे सारणं अर्धंच राहून गेलं बघ
चुटपुटत्या त्या भेटीत बोलणं अर्धंच राहून गेलं बघ ॥

घोषणा तेवढ्यात झाली एक भानावरती आलीस ऐकून
तुझी उडाली एकच धांदल पर्स पुस्तकं घेता आवरून
तुझी पडलेली खुर्ची उचलणं अर्धंच राहून गेलं बघ
चुटपुटत्या त्या भेटीत बोलणं अर्धंच राहून गेलं बघ ॥

इतक्या कमी वेळात मला किती आनंद देऊन गेलीस
तात्पुरते का होईना माझे सारे तणाव घेऊन गेलीस
कसं जमलं तुला विचारणं अर्धंच राहून गेलं बघ
चुटपुटत्या त्या भेटीत बोलणं अर्धंच राहून गेलं बघ ॥

ओळख तुझी करून घेणं अर्धंच राहून गेलं बघ
चुटपुटत्या त्या भेटीत बोलणं अर्धंच राहून गेलं बघ ॥