चार दिसांनी फिरून येशील
परगावाहून आज खरा
वाट पाहती वाटेवरती
आसुसलेल्या ह्या नजरा
मीलन घटिका समीप आली
आज उशीर रे करू नको
गुपित आपुले आज रात्रीचे
विसरू नको रे विसरू नको ॥ १ ॥
परगावी तू जाण्याआधी
गडबडीत दिन ते गेले
कधी तयारी माझी नव्हती
कधी घरी अतिथी आले
जातानाचे नजरेमधले
भाव तुझे विस्मरू नको
गुपित आपुले आज रात्रीचे
विसरू नको रे विसरू नको ॥ २ ॥
वडीलधारे कोणी नाहीत
मुलेही आज घरी नसती
एकांताचे दंश मला बघ
पदोपदी शरीरी डसती
विरह भंगण्या लवकर ये रे
ताणून आणखीन धरू नको
गुपित आपुले आज रात्रीचे
विसरू नको रे विसरू नको ॥ ३ ॥