आयुष्यात विलक्षण काही घडलं नाही बुवा
देवावाचून कधी काही अडलं नाही बुवा ॥

बालपणातच लागली होती विज्ञानाची गोडी
विज्ञानानेच सोडवली ती बालपणीची कोडी
चमत्काराचं वेड कधी जडलं नाही बुवा
देवावाचून कधी काही अडलं नाही बुवा ॥

परीक्षेत कधी चांगली कधी वाईट आली वेळ
कधी झालो पास कधी नापासाचा खेळ
नवसावाचून शिक्षण काही रखडलं नाही बुवा
देवावाचून कधी काही अडलं नाही बुवा ॥

प्रेमामध्ये पडत होतो मुलीच्या प्रत्येक
नाही म्हणाल्या चार शेवटी हो म्हणाली एक
स्वर्गामधल्या गाठींना मी छेडलं नाही बुवा
देवावाचून कधी काही अडलं नाही बुवा ॥

कधी होती चांगली कधी नव्हतीही नोकरी
घरच्यांची अन् शेजाऱ्यांची नजर असे बोचरी
भकास जीवन दारूत कधी बुडलं नाही बुवा
देवावाचून कधी काही अडलं नाही बुवा ॥

आप्त आणि मित्रांना आजारपण नाही चुकले
काही जण वाचले काही वाचू नाही शकले
मृत्यूपासून जगात कुणीच दडलं नाही बुवा
देवावाचून कधी काही अडलं नाही बुवा ॥

देवभक्ती म्हणतात असते संस्कारांची ठेव
पण चागलं वागा कळण्यासाठी हवा कशाला देव
वडिलधाऱ्यांचं ऐकून कुणी बिघडलं नाही बुवा
देवावाचून कधी काही अडलं नाही बुवा ॥

देवाच्या नावाखाली नुसतेच बाजार भरतात
जितक्या व्यक्ती तितक्या देवाच्या व्याख्या करतात
कुठलंच स्पष्टीकरण मनाला भिडलं नाही बुवा
देवावाचून कधी काही अडलं नाही बुवा ॥

संकटं पुढेही येत राहतील त्याचा काय खेद
संकटांना आस्तिक नास्तिक असला नसतो भेद
पुढेही कधी अडेल असं वाटत नाही बुवा
देवावाचून कधी काही अडलं नाही बुवा ॥

आयुष्यात विलक्षण काही घडलं नाही बुवा
देवावाचून कधी काही अडलं नाही बुवा ॥