शांत होते रस्ते झाली होती निजानीज
आमच्या शहरामधून एकदम गायब झाली वीज || धृ ||
घामाघूम झालो आम्ही सारे बसलो उठून
एसीकरता बंद घर वारा येईल कुठून
थोड्याच वेळात येईल आमचा विचार होता पक्का
प्रात:काळी पेपर वाचून बसला मोठा धक्का
सात दिवस बंद राहील करा तुम्ही तजवीज
आमच्या शहरामधून एकदम गायब झाली वीज || १ ||
आंघोळीला पाणी तापवा उचला ती पातेली
बंद होता मायक्रोवेवही पंचाईत झाली
इस्त्री कशी चालेल कपडे आमचे चोळामोळा
मला ऑफिस मुलांना गाठायची होती शाळा
वाॅशिंग मशीन बंद आणि बंद झाला फ्रीज
आमच्या शहरामधून एकदम गायब झाली वीज || २ ||
सिग्नल सगळे बंद लागल्या होत्या लांब रांगा
गाठू कसं ऑफिस आता कुणीतरी ते सांगा
चालत गेलो शेवटी भलतीच झाली तंगडतोड
वजन माझं भारी चांगली जिरली माझी खोड
एका दिवसात बुटांची अन् झाली चांगलीच झीज
आमच्या शहरामधून एकदम गायब झाली वीज || ३ ||
घरी आलो लिफ्ट बंद जिने चढलो बारा
धाप लागली मला अन् घामाच्या येती धारा
रेडिओ टीवी करमणुकीची साधनं काही नव्हती
भुतांसारखे बसलो आम्ही मेणबत्तीच्या भोवती
काढायचे होते सहा दिवस अजून विजेखेरीज
आमच्या शहरामधून एकदम गायब झाली वीज || ४ ||