नियम कायदे सारे आता झुगारून तू टाक रे
वैमानिका तू ऐक सांगतो विमान वेगे हाक रे || धॄ ||
गेलो तुझ्याच संगे
रंगलो तिथल्या रंगे
परत यायचे माझे
स्वप्न कितीदा भंगे
येर्इन वर्षभरात
म्हणून हलविला हात
तीन वर्षं पण सरली
परते मी देशात
कितीक आल्या चिठ्ठ्या तरीही केली डोळेझाक रे
वैमानिका तू ऐक सांगतो विमान वेगे हाक रे || १ ||
माता दु:खी बैसे
दिवस काढले कैसे
अपत्य दिसले नाही
आले केवळ पैसे
पैसे नकोत तिजला
अश्रूंनी समयही भिजला
आठव येता माझा
जीवनक्रमही थिजला
नको परीक्षा अधिक आर्इची तुला घालतो धाक रे
वैमानिका तू ऐक सांगतो विमान वेगे हाक रे || २ ||
विरह भावना मनी
वाट पाहते सजणी
आठवणीतच झुरते
गुंतून माझ्या वचनी
आठवणी मनी भरता
रूप तिचे ते स्मरता
तळमळतो मी येथे
एका स्पर्शाकरता
ऐकू येते येथवरी मम आर्त तिची ती हाक रे
वैमानिका तू ऐक सांगतो विमान वेगे हाक रे || ३ ||