धीरगंभीर समुद्र
शांत कधी कधी रूद्र
बाकी सारे क्षुद्र
लीन होती समोरी
रणरणते ते रण
समुद्र वाळूकण
हाळांचे रिंगण
शिक्षा काय अघोरी || १ ||
बर्फाच्छादित पर्वत
रौप्यरूपेरी मिरवत
अक्षर गगनी गिरवत
काव्य साकार करती
नितळ निळे आकाश
सोनेरी प्रकाश
स्वच्छ मोकळ श्वास
भरारते मन वरती || २ ||
मेघ नभी थरथरले
सर सर पाणी झरलेे
नदी नालेही भरले
सचैल भिजली धरा
कोंब नवे अंकुरले
हिरव्या रंगी मुरले
नवीन जीवन स्फुरले
चमत्कार तो खरा || ३ ||