कोपर्‍यात एक जळमट
खुर्चीवर डाग कळकट
भिंत थोडीशी तेलकट
पण इथल्या प्रत्येक वस्तूवर मायेचा थर आहे
ही शोरूम नाही घर आहे || १ ||

एखादा मोजा हरवला
एखादा कप तडकला
एखादा स्क्रू निखळला
पण इथे प्रत्येक पाहुण्याच्या सोयीवर नजर आहे
हे ऑफिस नाही घर आहे || २ ||

थोडे कपडे अस्ताव्यस्त
पलंगावर चादरी स्वस्त
पुस्तकं इतस्तत: मस्त
पण इथे हवी ती वस्तू हव्या त्या जागेवर आहे
हे  हॉटेल नाही घर आहे || ३ ||

कुणी कधी कान खाजवतं
कुणी कधी जोरात शिंकतं
कुणी रोज रात्रभर घोरतं
पण इथे सार्‍यांना एकमेकांबद्दल आदर आहे
हे थेटर नाही घर आहे || ४ ||

कधी आमटीत जास्त मीठ
भाजी शिजली नाही नीट
भाताचं कच्चं शीत
पण इथे पदार्थांना मायेची झालर आहे
हे रेस्टॉरंट नाही घर आहे || ५ ||

फ्रेंड्स बनत नाहीत
लाइक्स मिळत नाहीत
कॉमेंट्‌स दिसत नाहीत
पण इथे आपल्या माणसांचा वावर आहे
हे फेसबुक नाही घर आहे || ६ ||

घरी येण्याचे नियम
नीट खाण्याचे नियम
वेळेत झोपण्याचे नियम
पण इथे नियमांच्या आड प्रेमाची पाखर आहे
हे हॉस्टेल नाही घर आहे || ७ ||

ऊब आहे आच नाही
नियम आहेत जाच नाही
कारणं आहेत उगाच नाही
एवढीशी घागर त्यात जीवनाचा सागर आहे
हेच माझं जग माझं घर आहे || ८ ||