कोपर्यात एक जळमट
खुर्चीवर डाग कळकट
भिंत थोडीशी तेलकट
पण इथल्या प्रत्येक वस्तूवर मायेचा थर आहे
ही शोरूम नाही घर आहे || १ ||
एखादा मोजा हरवला
एखादा कप तडकला
एखादा स्क्रू निखळला
पण इथे प्रत्येक पाहुण्याच्या सोयीवर नजर आहे
हे ऑफिस नाही घर आहे || २ ||
थोडे कपडे अस्ताव्यस्त
पलंगावर चादरी स्वस्त
पुस्तकं इतस्तत: मस्त
पण इथे हवी ती वस्तू हव्या त्या जागेवर आहे
हे हॉटेल नाही घर आहे || ३ ||
कुणी कधी कान खाजवतं
कुणी कधी जोरात शिंकतं
कुणी रोज रात्रभर घोरतं
पण इथे सार्यांना एकमेकांबद्दल आदर आहे
हे थेटर नाही घर आहे || ४ ||