गप्पा मारणं, बसणं, भेटीला जाणं
फालतू विनोद सांगून परतून येणं
एखाद्या रात्रीला झोपायला जाणं
कधी सकाळ होते वाट पाहाणं

आत्तापर्यंत होती माझ्या विचारी
इतुक्यापुरती इस्पितळाची वारी || १ ||

जावे लागे रूग्णाच्या भेटीसाठी
नकळत चढते माझ्या कपाळी आठी
त्यातही रविवारी जर भेट ललाटी
येवोनी आवंढा गळ्याशी दाटी

पाहण्यापूर्वी पिक्चर रात्रीच्या पारी
उरकून घेर्इ इस्पितळाची वारी || २ ||

सुदॄढतेचा वर जणू मला मिळाला
सूपरमॅनचा चेला समजे स्वत:ला
साधेसुधे निमित्त झाले तापाला
रिपोर्टने झिणझिण्या आल्या डोक्याला

ऐसा कैसा इतुका पडलो आजारी
माझी पहिली इस्पितळाची वारी || ३ ||

इस्पितळी माझे कपडे तोकडे
आजूबाजू सारे चेहरे वाकडे
हाताच्या नळीला सलाइन जडे
गोळ्यांचा रतीब मुखात पडे

केले कोणी मजला चित मुंड्या चारी
आरंभली इस्पितळाची वारी || ४ ||

अन्नाावरची माझी गेली वासना
काहीच नीट ना वाटे मन्मना
भलभलते विकार जडले तना
वाढत चालला अशक्तपणा

काही खाता केवळ येर्इ ओकारी
वाढत जार्इ इस्पितळाची वारी || ५ ||

कोण कोण मजला भेटाया आले
कोणी कोणी काय विनोद केले
कोण तेथे रात्रीपुरते थांबले
कसलेही महत्व मनाला नुरले

केवळ वाटे केव्हा जातो माघारी
पुरे झाली इस्पितळाची वारी || ६ ||

फोटोत जायचा राहिलो खरा
डॉक्टरी यत्नांनी जाहलो बरा
जरी लागीयला उशीर जरा
आपुल्या पायांनी चाललो घरा

परतुनी आलो पुन्हा आपुल्या संसारी
पूर्ण झाली इस्पितळाची वारी || ७ ||

पाहून समजलो घरच्यांचे चेहरे
आप्तमित्र मदतीला ते खरे
त्यांच्यामुळे माझे संकट सरे
उपकारांनी माझे मन हे भरे

ठिकाणावर आली अक्कल सारी
उपयोगी इस्पितळाची वारी || ८ ||

आला प्रसंग ऐसा कोणावरती
झाला तुमचा कोणी स्नेही जर भरती
जावोनी मदत करावी पुरती
साधी कामेही महत्वाची ठरती

हल्ली माणसांची चणचण भारी
नेमे करा इस्पितळाची वारी || ९ ||