शाळेमध्ये अपूर्ण आहे गॄहपाठाची वही
प्रगतीपुस्तकावरी विसरलो जरी वडिलांची सही
आर्इवडिलांची मदत मागण्या नाही काही अर्थही

उरला सुरला धीर कुडीतून तुमच्या जर पांगला
वही सहीच्यासाठी असावा मित्र एक चांगला || १ ||

तुम्ही तिच्यावर मरता ठाऊक होते हे गावाला
प्रसंग आला बाका जेव्हा कळे तिच्या भावाला
तुमचा भाऊ बहीण तयांची मदत फक्त नावाला

मिलन मनांचे व्हावे ज्याने चंगं असा बांधला
प्रेमभंग कथण्यास असावा मित्र एक चांगला || २ ||

गॄहस्थाश्रम नित्य नव्या खर्चांनी करी बेजार
नव्या नव्या गरजा उद्भवती नवे नवे आजार
अपत्य पडती कमी समजण्या चिंता तुझ्या हजार

मदत नाही पण व्यथा ऐकण्या सवे तुझ्या थांबला
विरंगुळा देण्यास असावा मित्र एक चांगला || ३ ||

वार्धक्याने सुरू जाहली शारीरिक कुरबुर
सायंकाळी आयुष्याच्या अनामिक हुरहूर
आपुले मन गोंजारत राही पत्नी मनाने दूर

तुझे रंजणे ऐकून तरीही जो न कधी गांजला
मरणाला हसण्यास असावा मित्र एक चांगला || ४ ||

नातलगांची तुझ्या भोवती नसे कधी कमतरता
दाम अपेक्षांचे मोजावे लागे नात्यांकरता
कोणाचे मन कधी दुखावे सतत असे शक्यता

मतभेदांना मनात ठेवून जो न कधी भांडला
नात्यांच्या पलीकडे असावा मित्र एक चांगला || ५ ||