बलाढ्य होता शत्रू त्याची शस्त्रे होती भारी
तीन दिवस तरी तसाच आम्ही लढा ठेविला जारी
वरूनी ये आदेश शत्रूला तीन दिवस तरी रोखा
होतो थोडे तरीही शत्रुला दिला नाही मोका

केली माझ्या तुकडीने अन् पराक्रमाची शर्थ
दिवस तीन होता युद्धाला उरला नव्हता अर्थ || १ ||

हाती लागे ते ते घेऊन आम्ही काढला पळ
गाठण्यास अन् फिरलो मागे सुरक्षित तो तळ
एक जवान सांगतो जेव्हा दिन येतसे सरत
दोस्त राहिला मागे जातो आणावयास परत

मन माझे आले दाटुनिया पाहून तो निस्वार्थ
पण मॄत्यूच्या तोंडी जाण्या उरला नव्हता अर्थ || २ ||

वदलो त्याला धोका किती ती तुजला आहे जाण
मित्राचेही नक्कीच तुझिया गेले असतील प्राण
ऐकण्यास तो तयार नव्हता भरूनी आला गळा
वदत राहिला एकच जाणे भागच आहे मला

जाऊनी अंती दिले बोलणे ऐकत नव्हता सार्थ
भावनांसवे वाद घालण्या उरला नव्हता अर्थ || ३ ||

फार समय लोटला पडावी मध्यरात्रही झाली
चिंतेने अन् त्याच्या आमुचा जीव होर्इ वरखाली
चालत येणारी ती छबी मग आम्हां लागली दिसू
खांद्यावरती ओझे ओठांवरती होते हसू

ठेवताच ते ओझे कळुनी आला मला अनर्थ
अचेत शरीरा उपचारातही उरला नव्हता अर्थ || ४ ||

त्यास म्हणे मी धोका घेऊन केलीस मोठी चूक
वाचविण्याची मित्राला आशा होती अंधुक
मला म्हणाला आधी तुम्ही पण ऐका पूर्ण कहाणी
सांगा मजला चूक असे का जाणे माझे रानी

मला विचारा सांगिन जाणे नव्हते माझे व्यर्थ
वाटत होते जरी मलाही उरला नव्हता अर्थ || ५ ||

दिसे मला तो प्राण कुडीतून सोडून नव्हते गेले
पाहून मजला येताना अन् ओठ तयाचे हलले
मला म्हणाला झुंजत होतो मॄत्यूशी ह्मा रात्री
येशील फिरूनी माझ्याकरता होती मजला खात्री

बोलून इतुके हमसाहमशी रडू लागला आर्त
सांत्वनभरल्या शब्दांनाही उरला नव्हता अर्थ || ६ ||