वर्षं झाली तेरा अब्ज आणि सत्तर कोटी
इतक्या पूर्वीपासून सॄष्टी अस्तित्वात होती
केवळ दोन लक्ष वर्षांपूर्वी अवतरलास
आहे तुझी कारकीर्द ह्मा भूतलावर छोटी
फार पूर्वी सुटला आहे समयाचा तो बाण
भानावर ये माणसा आहेस नगण्य किती ते जाण || १ ||
अब्ज अब्ज मंडलांपैकी आकाशगंगा एक
त्यातल्या अब्जो ताऱ्यांपैकी सूर्य आपला एक
सूर्याच्याही तीन लक्षांश आहे पॄथ्वी ग्रह
त्या ग्रहाच्या विस्तारावर केवळ कण तू एक
सॄष्टीच्या आकारापुढती कस्पट तुझे प्रमाण
भानावर ये माणसा आहेस नगण्य किती ते जाण || २ ||
पॄथ्वीच्या इतिहासामध्ये असंख्य प्राणीजाती
अव्याहत ते जैविक चक्र सतत येती जाती
तुझ्यानंतर अजून कोणी आलं नाही नवीन
तुझ्याआधीच्या कित्येकांची होऊन गेली माती
विश्वाच्या वटवॄक्षावरचं शेंडेफळ तू लहान
भानावर ये माणसा आहेस नगण्य किती ते जाण || ३ ||