जन्मदिन असे ब्रह्मांडाचा एक जानेवारी
आणि पुढील घडामोड समजा वर्षात झाली सारी
पहिले आठ महिने सूर्यच अस्तित्वात नव्हता
ऑगस्ट वीस दिवशी आली सूर्याची मग स्वारी || १ ||

एकतीस ऑगस्ट सकाळचे अन् वाजले पावणेअकरा
जन्म पृथ्वीचा झाला सूर्याभोवती मारत चकरा
सोळा सप्टेंबर खदखदू लागली रसायने
जीवनाच्या धुगधुगीला उशीरच झाला खरा || २ ||

झाडं तयार झाली तारीख पाच डिसेंबर
प्राणी तयार झाले तारीख आठ डिसेंबर
सारे होते जगत समुद्राच्या पाण्याखाली
सतरा डिसेंबर उजाडला येण्या जमिनीवर || ३ ||

बावीस डिसेंबर सरपटणारे प्राणी आले
तेवीस तारखेपर्यंत सस्तन प्राणी तयार झाले
पंचवीस तारखेस सुरू झालं डायनॉसॉर्सचं राज्य
तीस तारीख आली डायनॉसॉर्स लयास गेले || ४ ||

एकतीस डिसेंबरचे रात्री वाजून गेले दहा
पृथ्वीवरती मनुष्याचा पत्ता नाही पाहा
पावणेअकरा वाजता आले मनुष्यांचे पूर्वज
अकरा बावन्न वाजले शेवटी आपण आलो अहा || ५ ||

वर्ष संपण्याकरता फक्त पंचवीस सेकंद उरता
तेव्हा कुठे माणूस पृथ्वीवरती वसला पुरता
ऋग्वेद लिहून झाले आहेत नऊ सेकंद केवळ
केवळ एक सेकंद चालली ब्रिटिशांची निष्ठुरता || ६ ||

स्वतंत्र होऊन भारताला पापणी केवळ लवली
पारतंत्य्राच्या जखमेवर धरली नाही खपली
विचार कर व्यापक वाटतील क्षुल्लक साठ वर्षं
निर्धाराची वॄत्ती तुझी एवढ्यात कुठे लपली || ७ ||

ब्रह्मांडाच्या सेकंदांचा पुढे विचार कर
लाग आता कामाला तू कसून तुझी कंबर
येर्इल आपल्या देशामध्ये निश्चित सुवर्णकाळ
थोडा धीर धर राजा थोडा धीर धर || ८ ||