नाही त्याला रंग तरीही डोळ्यां भासे छान
नाही त्याला चव तरीही जिभेस लागे छान
एक ऑक्सिजन जोडीला अन् दोन हायड्रोजन
जीवसॄष्टीच्या खजिन्यामधले सर्वात अमूल्य धन

जीवनावश्यक गोष्टींमध्ये मोठा त्याला भाव
त्याला जीवन ऐसे नाव || १ ||

फार तापलं जर का तर ते भाजून काढू शकतं
अती गोठलं जर का तर ते थिजवून टाकू शकतं
वाचवेल ते तुम्हास जर का कुठे लागली आग
बुडवून टाकू शकेल जर का आला त्याला राग

प्रकोप त्याचा झाला असता होते धावाधाव
त्याला जीवन ऐसे नाव || २ ||

बटाट्यामध्ये ऐशी टक्के भरून तेच तर असतं
टॉमेटोत तर पाचच टक्के बाकी काही असतं
शरीरं तुमची आमची जरीही दिसती घनरूप वरून
पण शरीरामध्ये दोन तॄतियांश तेच असतं भरून

काढलं ते जर आपल्यामधून राहील काय बचाव
त्याला जीवन ऐसे नाव || ३ ||

त्याच्यासारखे रासायनिक पदार्थ आहेत न्यारे
पण पृथ्वीवरच्या तापमानास वाफ होती सारे
फक्त त्याचा घन विरळ द्रवापेक्षा असतो
म्हणूनच बर्फ पाहा नेहेमी पाण्यावर तरंगतो

इतर सार्‍यांपेक्षा त्याचा आहे भिन्न स्वभाव
त्याला जीवन ऐसे नाव || ४ ||

तेरा अब्ज परार्ध लिटर पॄथ्वीवर ते राही
पण त्याच्यापैकी तीनच टक्के समुद्रांत नाही
तीन टक्क्यांपैकी फक्त एक शतांश आपलं
बाकी सारं धृवांवरच्या बर्फामध्ये लपलं

ह्मात आले नदी नाले आणि सर्व तलाव
त्याला जीवन ऐसे नाव || ५ ||

सांडपाणी अन् कारखान्यांनी दूषित होर्इ भरभर
नळ सोडून ठेवण्याआधी विचार क्षणभर कर
महत्व त्याचे किती आहे ते सांगू न लागे सूज्ञा
अज्ञानाने करू नको तू अतिपरिचयात अवज्ञा

आहे त्याला जपून ठेवणे नाही दुसरा वाव
त्याला जीवन ऐसे नाव || ६ ||