कधी सूक्ष्मदर्शकातून दिसे कधी दुर्बिणीचा वापर
किती सूक्ष्म हे चराचर
किती भव्य हे चराचर || धृ ||

मांजर कुतरा उंदीर खारी काऊ चिऊ अन् मुंगी
अश्व उंट अन् जिराफ हत्ती मासे कितीतरी जंगी
लहानमोठ्या किती जीवांचा सभोवती वावर
किती सूक्ष्म हे चराचर
किती भव्य हे चराचर || १ ||

मीठ स्फटिक अन् परागकण त्याहून छोटी ती पेशी
सह्माद्री विन्ध्याहून उंच हिमालय माझ्या देशी
कणकणांचा पर्वत अन् थेंबांचा तो सागर
किती सूक्ष्म हे चराचर
किती भव्य हे चराचर || २ ||

पाण्याच्या रेणूत चिमुकला हायड्रोजनचा अणू
चंद्र पॄथ्वीहून विशाल सविता तीन पिढ्या त्या जणू
अणू दिसे ना कुणा कुणी ना गेले सूर्यावर
किती सूक्ष्म हे चराचर
किती भव्य हे चराचर || ३ ||

अणूच्या केंद्राभवती फिरतो इलेक्ट्रॉन किती सान
सूर्यमालेस कोते आकाशगंगेमध्ये स्थान
प्रयोगांती ना शंका उरते त्यांच्या शोधावर
किती सूक्ष्म हे चराचर
किती भव्य हे चराचर || ४ ||

प्लँकच्या स्थिरांकानंतर काहीच उरे ना छोटे
ब्रह्मांडाच्या व्याप्तीपुढे काहीच असे ना मोठे
वैज्ञानिक करती सॄष्टीचे गुपित असे सादर
किती सूक्ष्म हे चराचर
किती भव्य हे चराचर || ५ ||

कधी सूक्ष्मदर्शकातून दिसे कधी दुर्बिणीचा वापर
किती सूक्ष्म हे चराचर
किती भव्य हे चराचर || धृ ||