मुहूर्त शोधत असशील चांगलं करण्याकरता काही
तर आजच्यासारखा दिवस शोधून सापडणार नाही ॥

जिभेवर नाही ताबा रोज वाढत चाललंय वजन
सोप्पं आहे म्हणत म्हणत सुटत नाही व्यसन
फेक सिगरेट उठ लवकर चालण्याकरता पायी
आजच्यासारखा दिवस शोधून सापडणार नाही ॥

गायन वादन चित्रकलेने मिळे किती आनंद
आयुष्यात एक चांगला जोपासायचाय छंद
काढ गिटार, कॅन्वास, ब्रश मागे सारून बाही
आजच्यासारखा दिवस शोधून सापडणार नाही ॥

मैत्रिणीला फोन करायचा राहून गेला पाहा
मित्राशी त्या भांडून बघ वर्षं झाली सहा
फोन सोड भेटूनच ये कर आता घाई
आजच्यासारखा दिवस शोधून सापडणार नाही ॥

भेटीन सावकाश एवढं काय बुडतंय त्याने जग
ज्यांना नसतात त्यांना एकदा विचारून तर बघ
तुला भेटण्या आतुर तुझे बाबा आणि आई
आजच्यासारखा दिवस शोधून सापडणार नाही ॥

ऑफिसमध्ये उशीर व्हायला कारण काही नसतं
पत्नी मुलांना घेऊन जरा फिरायला जा मस्त
कुटुंबीयांच्यासोबत एकदा काढण्या वेळ असाही
आजच्यासारखा दिवस शोधून सापडणार नाही ॥

करायचंय ते कर जोवर आहेस धट्टाकट्टा
कुणीच घेऊन येत नाही अमरत्वाचा पट्टा
न्याहाळण्याला नजर वर करून दिशा दाही
आजच्यासारखा दिवस शोधून सापडणार नाही ॥

मुहूर्त शोधत असशील चांगलं करण्याकरता काही
तर आजच्यासारखा दिवस शोधून सापडणार नाही ॥