‘भारत माझा देश आहे. सारे भारतीय माझे बांधव आहेत. माझ्या देशावर माझे प्रेम आहे …’ आपल्यापैकी प्रत्येकाने शाळेत असताना ही प्रतिज्ञा म्हटलेली आहे. धर्म, जात, प्रांत, भाषा असल्या भेदभावांच्या पलीकडे जाऊन एक देश म्हणून एकत्र येण्याचा संदेश ही प्रतिज्ञा देते. आज पंचाहत्तराव्या स्वातंत्र्यदिनाच्या पूर्वसंध्येला प्रत्येक भारतीयाने ही प्रतिज्ञा पुन्हा एकदा करण्याची वेळ आली आहे. केवळ औपचारिकता म्हणून नव्हे तर त्यामागील अर्थ समजून घेऊन …ही कविता यूट्यूबवर https://youtu.be/VAVE5ntF3FM ह्या ठिकाणी ऐकता येईल.
इतिहासाने घालून दिलेली पृथ्वीवरील वेस आहे
श्वासाइतकं सत्य आहे भारत माझा देश आहे ॥
भिन्न धर्म जात पंथ असती प्रत्येकाचे अपुले अपुले
तरीही सारे बंधू, भगिनीच – भारत शब्दच श्लेष आहे ॥
जननी जन्मभूमिश्च स्वर्गादपि गरीयसी म्हणतो
प्रेम आहे ह्या देशावरती हाच तो संदेश आहे ॥
विविध वर्ण विविध भाषा आणि सणही नटले वैविध्याने
अभिमान समृद्ध परंपरेचा वेगवेगळा जरी वेष आहे ॥
पालक गुरुजन वडिलधारे ह्यांचा मान ठेवीन नक्की
प्रत्येकाशी सौजन्याने वागेन हा शिरसावंद्य आदेश आहे ॥
देश आणि देशबांधवांशी निष्ठा हीच माझी प्रतिज्ञा
त्यांचे कल्याण आणि समृद्धी ह्यातच माझ्या सौख्याचा समावेश आहे ॥
लहानपणी आपण प्रत्येकाने ही प्रतिज्ञा म्हटली होती
आता मात्र शब्दांबरोबर त्यातील भावनाही नामशेष आहे ॥
माझे धर्म भाषा प्रांत त्याचे धर्म भाषा प्रांत
माझ्या देशातील बांधवांमध्येही आता सख्खे सावत्र अशी रेष आहे ॥
येईल का तो सुदिन जेव्हा सारे भारतीय बांधव होतील
आणि म्हणतील विविधतेत एकता म्हणूनच माझा देश विशेष आहे ॥
इतिहासाने घालून दिलेली पृथ्वीवरील वेस आहे
श्वासाइतकं सत्य आहे भारत माझा देश आहे ॥
