नाही सुकाणू नाही शीड ना वल्ह्यांचाही ठाव
आयुष्य जैसे नावाड्यावाचून असावी नाव || धृ ||

ऐलतीराचा पत्ता नाही पैलतीर ना ठावे
कशास आलो कुठे चाललो कुणी कुणा सांगावे
प्रवाह जैसा जैसा वारा तैसीच घेई धाव
आयुष्य जैसे नावाड्यावाचून असावी नाव || १ ||

कधी जाई वर आनंदाच्या लाटेवर आरूढ
खोल खोल कधी जाई पडता दुःखाचे गारुड
कुणास न कळे कोण खेळतो सापशिडीचा डाव
आयुष्य जैसे नावाड्यावाचून असावी नाव || २ ||

भव्य सागरी असंख्य नौका तरंगती भोवती
कुणी जातसे दूर सोडूनी कुणी बने सोबती
किती दिसांचे नाते त्यांचे नसे समजण्या वाव
आयुष्य जैसे नावाड्यावाचून असावी नाव || ३ ||

कुणी जमवितो पैसा अडका मेहनत अति करून
कुणी खर्चीतो पैसा अडका दिसण्यासाठी तरुण
विस्मरती धन सौंदर्याला पैलतीरी ना भाव
आयुष्य जैसे नावाड्यावाचून असावी नाव || ४ ||

कुणी म्हणे की देशाकरता चाले माझी होडी
कुणी म्हणे की धर्मासाठी प्रवासात ह्या गोडी
देश धर्मही शाश्वत नाही कितीही आणला आव
आयुष्य जैसे नावाड्यावाचून असावी नाव || ५ ||

कशीही असू दे नावेवरती ऐसी जडली प्रीती
बुडेल का कधी ज्याच्या त्याच्या मनात जडली भीती
सर्वां ठाऊक अमर ना कुणी रंक असो वा राव
आयुष्य जैसे नावाड्यावाचून असावी नाव || ६ ||

नाही सुकाणू नाही शीड ना वल्ह्यांचाही ठाव
आयुष्य जैसे नावाड्यावाचून असावी नाव || धृ ||