जगामध्ये सतत दिसते नव्याची नवलाई
पण बदलत नाहीत पिढ्यान् पिढ्या गोष्टी काही काही ॥ धृ ॥

पूर्वी एस्टीने जाताना आकाशातील विमान पाहून मुलं होत असत आनंदी
आता विमानातून खाली बघण्याची बरेचदा मिळते संधी
मात्र लांबचा प्रवास म्हंटला की मुलांचं मन कसं उचंबळून जाई
बदलत नाहीत पिढ्यान् पिढ्या गोष्टी काही काही ॥ १ ॥

पूर्वी मुलांनी शिक्षणात चमकावं म्हणून अभ्यासाचा धोशा लागायचा रोज
हल्ली पालक म्हणतात मुलांनी जिंकावेत रियालिटी शोज
मात्र अपत्याचं यश पाहून अजूनही देवापुढे साखर ठेवते त्याची आई
बदलत नाहीत पिढ्यान् पिढ्या गोष्टी काही काही ॥ २ ॥

पूर्वी ग्रॅजुएट झालं की वाटायचं आला दोन बोटांवर स्वर्ग
हल्ली डबल ग्रॅजुएट मुलांचीही वाट पाहत असतो पुढल्या कोर्सचा वर्ग
मात्र शिक्षणाचा प्रसार झाला तरी बेकारी दिसते ठायी ठायी
बदलत नाहीत पिढ्यान् पिढ्या गोष्टी काही काही ॥ ३ ॥

पूर्वी खिसा किंवा पुस्तक तिचा फोटो ठेवायला जागा फक्त दोन
हल्ली तिच्या चेहेऱ्याचा वॉलपेपर मिरवत असतो मोबाईल फोन
मात्र तिला प्रत्यक्षात बघितल्यावर हृदयाची धडधड तशीच राही
बदलत नाहीत पिढ्यान् पिढ्या गोष्टी काही काही ॥ ४ ॥

पूर्वी गावस्कर बॅटिंगला आला की चिकटून राहायचा रेडिओला कान
हल्ली विराट बॅटिंगला आला की टीवीसमोरून हलायचं विसरून जातो भान
मात्र शतक हुकलं कोणाचं तर तेवढीच खंत वाटते आताही
बदलत नाहीत पिढ्यान् पिढ्या गोष्टी काही काही ॥ ५ ॥

पूर्वी चुकल्या चुकल्यासारखं वाटायचं जर आला नाही सकाळचा पेपर
हल्ली चुकल्या चुकल्यासारखं वाटतं टीवीचा हरवला रिमोट जर
मात्र बातम्या समजून घेण्याकरता अजूनही तशीच असते घाई
बदलत नाहीत पिढ्यान् पिढ्या गोष्टी काही काही ॥ ६ ॥

पूर्वी स्त्रीमुक्तीचा लढा चालू होता स्त्रीयांच्या शोषणाविरूद्ध
हल्ली स्त्रीमुक्तीचा लढा चालू आहे स्त्रीयांच्या शोषणाविरूद्ध
मात्र पुरूष अजूनही स्वत:ला मालक समजतो आणि गुलाम ठरते बाई
बदलत नाहीत पिढ्यान् पिढ्या गोष्टी काही काही ॥ ७ ॥

पूर्वी राजकारणी आणि नोकरशाहीतील मंडळी लाखो रूपये खात
हल्ली राजकारणी आणि नोकरशाहीतील मंडळी करत नाहीत करोडोंच्या खाली बात
मात्र जनता आपली पीठ दळते आणि जो तो जनतेचाच पैसा खाई
बदलत नाहीत पिढ्यान् पिढ्या गोष्टी काही काही ॥ ८ ॥

जगामध्ये सतत दिसते नव्याची नवलाई
पण बदलत नाहीत पिढ्यान् पिढ्या गोष्टी काही काही ॥ धृ ॥