आधी कपाळ मग नाक मग हनुवटीची ओलांडली वेस
आयुष्यात पहिल्यांदाच इतके वाढवले आहेत केस ॥ धृ ॥
कोरोनाच्या साथीनं जगभरात माजवला कहर
आणि इकडे माझ्या डोक्याच्या बगिच्याला लवकरच आला बहर
कुत्सित मित्र म्हणतात कुणाचं काय तर कुणाचं काय
ठणकावतो मी त्यांना, ज्याच्याकडे असते चादर तोच पसरतो पाय
ह्या वयात त्यातील बऱ्याच जणांच्या डोक्यावर केसाचा नाही लवलेश
आयुष्यात पहिल्यांदाच इतके वाढवले आहेत केस ॥ १ ॥
लहानपणी डोक्यावर हजामतीची नियमित घडत असे सेवा
पण मित्रांचे वाढवलेले केस बघून मला वाटत असे हेवा
मार खात असत शिक्षकांचा पण लावत नसत केसाला कातरी
तेच होते माझे बालपणीचे शूरवीर हीरो माझी पक्की होती खातरी
आम्ही ‘शहाणी मुलं’ वरवर म्हणायचो अशा मुलांना गॉन केस
आयुष्यात पहिल्यांदाच इतके वाढवले आहेत केस ॥ २ ॥