रविवारची सकाळ
माझी धूत होतो कार
नवीन माझी कार
मला प्रिय होती फार || १ ||
पाउस पडला होता
कालची सारी रात
लावून देणार नव्हतो पण
अन्य कोणा हात || २ ||
चिंटू उठला होता
आज मजा करायचा वार
खेळत होता कारभोवती
वय त्याचं चार || ३ ||
डावी बाजू धुवू लागलो
बदलून साबणपाणी
दगड पत्य्रावर घासल्याचा
आवाज आला कानी || ४ ||
जाऊन पाहिलं डोळ्यावरती
विश्वास बसला नाही
कारच्या दारावर चिंटू
लिहित होता काही || ५ ||
मस्तकशूळ उठला माझा
हरपून गेलं भान
तडक त्याला धरून त्याचा
जोरात पिळला कान || ६ ||
विचार करण्यापलीकडे मी
गेलो होतो पार
मिळेल त्याने हातावरती
केले चार प्रहार || ७ ||
दगड होता हाती त्याच्या
बंद होती मुठ
तरीही थांबलो नाही त्याला
मारलं मी बेछूट || ८ ||
कळवळून ओरडला तो
गेली त्याची शुद्ध
रक्त पाहून हातावरचं
मीही झालो स्तब्ध || ९ ||