उजव्याच हाती खावे
डावीकडून जावे
तुमचे हे उजवे डावे
नाही मला समजले ॥ १ ॥

अक्षरे शब्द होती
वाक्येही त्यांची होती
पण अर्थ काय पोटी
नाही मला समजले ॥ २ ॥

अक्षरे थोडी ऐसी
अक्षरे थोडी तैसी
कथतील भाव कैसी
नाही मला समजले ॥ ३ ॥

एक आणि एक दोन
त्रिकोण पंचकोन
हे सर्व ठरवी कोण
नाही मला समजले ॥ ४ ॥

चित्रांमध्येच हसतो
स्वप्नांमध्येच वसतो
अभ्यास काय असतो
नाही मला समजले ॥ ५ ॥

शाळेत आणि घरचे
मज ताडती कधीचे
हसणे कसे चुकीचे
नाही मला समजले ॥ ६ ॥

शाळेत नाही मित्र
घरचेही तेच चित्र
हे वागणे विचित्र
नाही मला समजले ॥ ७ ॥

माशांसवे तरावे
पक्ष्यांसवे उडावे
वर्गात का बसावे
नाही मला समजले ॥ ८ ॥

माझ्यात नाही व्यंग
नाहीच मी अपंग
अलबेले माझे रंग
नाही तुला समजले ॥ ९ ॥