जिना उतरताना गच्च धरायचो तुझा हात
तुझा इवलासा पंजा पार लपून जायचा माझ्या हाताच्या आत
मग उड्या मारत उतरायचीस तू भीती न वाटता अजिबात
अगदी आत्ता आत्तापर्यंत || १ ||

माझ्या खांद्यावर बसण्याचा तुला लागला होता छंद
अलगद उचलून घ्यायचो धरून तुझे दोन्ही दंड
खांद्यावर बसल्यावर मात्र भीतीने तुझी चुळबुळ व्हायची बंद
अगदी आत्ता आत्तापर्यंत || २ ||

शाळेत जाताना तुझं हमसून हमसून रडणं
खेळताना नेहमीचंच पडणं धडपडणं
आठवतंय तुझं राग गेला की गालात खुदकन हसणं
अगदी आत्ता आत्तापर्यंत || ३ ||

गणितात शत्रू नंबर एक म्हणजे भागाकार
मराठीवर कधी कधी इतके केलेस अत्याचार
पाठांतर म्हंटलं की सुरू व्हायची तुझी तक्रार
अगदी आत्ता आत्तापर्यंत || ४ ||

संध्याकाळी जेवताना बडबडायचीस दिवसभराच्या गोष्टी
कधी आनंदी असायचीस तर कधी असायचीस कष्टी
गोष्टी संपायच्या नाहीत ताटं तशीच राहायची उष्टी
अगदी आत्ता आत्तापर्यंत || ५ ||

गळ्याला मिठी मारायचीस पलंगावर उभी राहून
पाठीवर चढून बसायचीस साखरेचं पोतं बनून
कधीही पडशील अशी भीती वाटायची तुला दुडूदुडू धावताना बघून
अगदी आत्ता आत्तापर्यंत || ६ ||

आता मोठी मोठी पुुस्तकं वाचतेस झर्रकन
शाळेतल्या गहन प्रश्नांची उत्तरं देतेस पटकन
अगं चिऊकाऊच्या गोष्टी ऐकून हसत होतीस खुदकन
अगदी आत्ता आत्तापर्यंत || ७ ||

कधी झालीस मोठी आता खांद्याला लागतेस
मोठ्यांसारखं बोलतेस आणि तसंच वागतेस
म्हणायचो तुला मी किती पोरकटपणा करतेस
अगदी आत्ता आत्तापर्यंत || ८ ||

अशीच मोठी होत जाशील आमच्या लक्षात येर्इस्तोवर
घरट्यातून पक्षी उडून जातात तशी दूर जाशील खरोखर
तेव्हा आम्ही म्हणू होय, आमची लाडकी राहात होती आमच्या बरोबर
अगदी आत्ता आत्तापर्यंत || ९ ||