घरामध्ये ती तेवत असते जसा असावा दिवा
नसतानाही जाणवते ती जशी सुगंधी हवा
घरातील त्या सौख्य पीतसे तिच्याच हातून पाणी
राहती जागा घर बनविते घरामधील गृहिणी || १ ||

मुलांसवे ती दिवस दिवसभर अभ्यास असे गिरवत
सुट्टीमधले छंदवर्गही तीच अन् असे ठरवत
वागण्यामधील फरक मुलांच्या समजे तिजला झणी
राहती जागा घर बनविते घरामधील गृहिणी || २ ||

तीच ठरविते किती आणावे महिन्याचे सामान
कुठून मिळती स्वस्त वस्तू ही असते तिजला जाण
अन्नपूर्णाच जशी राहते आपुल्या छोट्या सदनी
राहती जागा घर बनविते घरामधील गृहिणी || ३ ||

आजाराची कोणावरही आली जर का वेळ
सेवेसाठी तत्पर जणू ती फ्लोरेन्स नाइटिंगेल
पथ्य पाळण्यासाठी दक्षता घेते ती अनुदिनी
राहती जागा घर बनविते घरामधील गृहिणी || ४ ||

लाजवेल जी वित्तमंत्य्रास सक्षम अर्थव्यवस्था
बचत करे ती बाजारातील किमती वाढत असता
प्रसंग येता बाका देते पैसे तव आणुनी
राहती जागा घर बनविते घरामधील गृहिणी || ५ ||

बाहेरचे अन् घरचे सारे काम पाडिते पार
सुट्टी नाही त्या कामाला ना सण ना रविवार
स्वागत करते आगंतुकांचे तरी प्रसन्न हसूनी
राहती जागा घर बनविते घरामधील गृहिणी || ६ ||

पदोन्नतीची आशा नाही पदक नाही ना चषक
गृहितच धरती सारे तिजला राबे तरीही अथक
कौतुक सारे तिचे करूया निदान ह्मा स्त्रीदिनी
राहती जागा घर बनविते घरामधील गृहिणी || ७ ||