कालचक्र हे फिरतच राही दुःख वृथा तू करू नको
विसात नव्वद शोधू नको ॥ धृ ॥

जुनी जाहली तुझी पिढी अन् नवी पिढी हे सरसावे
तुझ्या पिढीच्या स्वप्नांमागे नवी पिढी ती बघ धावे
काळाची ही नदी वाहती उगाच तिजला अडवू नको
विसात नव्वद शोधू नको ॥ १ ॥

थेटरातले जाती सिनेमे बघती सारे फोनवरी
क्रिकेटमधली षटके आली पन्नासाहून वीसवरी
कोहली बुमराच्या ह्या काळी सचिन कुंबळे आठवू नको
विसात नव्वद शोधू नको ॥ २ ॥

हॉटेलाचे जेवण होते कधीकाळची चैन खरी
इंटरनेट आता दिमतीला हॉटेलच ते येई घरी
नवीन पिढीचे आरोग्य घटते उगाच गमजा करू नको
विसात नव्वद शोधू नको ॥ ३ ॥

गाळावा लागत होता तुज मित्राला भेटण्यास घाम
काय बिघडले मैत्रीकरता वापरले जर इन्स्टाग्राम
करुनी ओरडा साप साप तू आता भुई धोपटू नको
विसात नव्वद शोधू नको ॥ ४ ॥

तंत्रज्ञानाची ही भरारी उंच जातसे वेगाने
संगणकाचे अप्रूप तुजला फोन आता पुरतो जाणे
डायलवाल्या कृष्णफोनच्या आठवणींनी झुरू नको
विसात नव्वद शोधू नको ॥ ५ ॥

पिकले केस लागला चश्मा निवृत्ती दिसते पुढती
जबाबदाऱ्या कमी जाहल्या कामे ना तुजवीण अडती
छंद जोपास कामावरती उशिरापर्यंत थांबू नको
विसात नव्वद शोधू नको ॥ ६ ॥

नव्वदात होते थोडे ते ऐंशी सत्तर साठही रे
नवीन सहस्रक असे निराळे बांधून घे तू गाठ ही रे
सज्ज उड्डाण करण्याकरता नवी पिढी थांबवू नको
विसात नव्वद शोधू नको ॥ ७ ॥

कालचक्र हे फिरतच राही दुःख वृथा तू करू नको
विसात नव्वद शोधू नको ॥ धृ ॥