कुठे सुखाचा ठेवा आहे अन् दु:खाचा भोग आहे
तुमचं माझं जगणं म्हणजे निव्वळ योगायोग आहे || धृ ||

सुयोग्य अंतर राखून फिरते सूर्याभवती अवनी
पोहोचत नाहीत उल्का कारण चंद्र वसतसे गगनी
गुंतागुंतीने प्रथिनांच्या सजीव बनले भुवनी

नको मला विज्ञान पुरेसा केवळ इतुका शोध आहे
तुमचं माझं जगणं म्हणजे निव्वळ योगायोग आहे || १ ||

एकच केवळ अंडाशय ते इतुक्या मोठ्या पोटी
एक जिंकला शुक्राणू अन् हरले कोटी कोटी
विजयाची तुमच्या सांगावी काय शक्यता होती

शक्यताऽशक्यतांचा ऐसा पिढ्यान्पिढ्यांचा ओघ आहे
तुमचं माझं जगणं म्हणजे निव्वळ योगायोग आहे || २ ||

आपल्या जन्मापूर्वी झाली स्वातंत्य्राची प्राप्ती
मुक्त समाजामध्ये वाढे भवितव्याची व्याप्ती
नसता विकल्प झाली नसती आकांक्षांची तॄप्ती

स्वतंत्रतेचा अमूल्य ठेवा वरदान हे अमोघ आहे
तुमचं माझं जगणं म्हणजे निव्वळ योगायोग आहे || ३ ||

जीवन संपविण्याच्यासाठी कारण पुरतं चिल्लर
दुषित पाणी वायू किंवा साला एक मच्छर
आरोग्याचे भोक्ते असाल कितीही तुम्ही कट्टर

पाहत तुमची वाट कुठेतरी बसला एक रोग आहे
तुमचं माझं जगणं म्हणजे निव्वळ योगायोग आहे || ४ ||

टायटॅनिकच्या प्रवाशांमध्ये आपलं नाव नाही
किल्लारीच्या भूकंपामध्ये आपलं गाव नाही
इतिहासातील युद्धांमध्ये आपणा ठाव नाही

अज्ञानाच्या अंधारातच आयुष्याचा मोद आहे
तुमचं माझं जगणं म्हणजे निव्वळ योगायोग आहे || ५ ||

झाड पडे कधी रस्त्यावरती त्याच्याखाली मरता
कुणी मद्यपी गाडी चालवे त्याचेही बळी ठरता
साध्या अपघातांनीसुद्धा मरणापुढती हरता

प्राक्तनातला लेखा आपल्याकरिता तरी अबोध आहे
तुमचं माझं जगणं म्हणजे निव्वळ योगायोग आहे || ६ ||

नेते असतात ठाम देश माझ्यामुळेच घडला
साधू असतात ठाम पाऊस माझ्यामुळेच पडला
श्रेय भविष्याचे घेण्याचा छंदच सर्वां जडला

तुम्ही आम्ही बैल नियती सर्वांची प्रतोद आहे
तुमचं माझं जगणं म्हणजे निव्वळ योगायोग आहे || ७ ||

कुठे सुखाचा ठेवा आहे अन् दु:खाचा भोग आहे
तुमचं माझं जगणं म्हणजे निव्वळ योगायोग आहे || धृ ||