तू आहेस तोवर ब्रह्मांड आहे
तुझं एकच आयुष्य आहे
काळजी घे || धृ ||

लक्षावधी माणसं जातात गाडीचे रूळ ओलांडून
शेकडो माणसं गाडीखाली जातात छिन्नविच्छिन्न सांडून
पुलावरून जाणं ही खास तुझ्याकरता केलेली सोय आहे
तुझं एकच आयुष्य आहे
काळजी घे || १ ||

लक्षावधी माणसं व्यसनाधीन होतात
शेकडो माणसं व्यसनांमुळे मरतात
क्षणिक तलफ पण किंमत फार जास्त आहे
तुझं एकच आयुष्य आहे
काळजी घे || २ ||

लक्षावधी माणसं गाड्या चालवतात बेदरकार
शेकडो माणसांवर पडते अपघाताची कुठार
वाचणार्‍या मिनिटांकरता गमावलेल्या वर्षांचं मोल फार मोठं आहे
तुझं एकच आयुष्य आहे
काळजी घे || ३ ||

लक्षावधी माणसं आरोग्याची करतात हेळसांड
शेकडो माणसं अल्पायुषी ठरतात जरी दिसली आडदांड
लवकर उठायचा कंटाळा हे कारण अनाठायी आहे
तुझं एकच आयुष्य आहे
काळजी घे || ४ ||

लक्षावधी माणसं पैसा कमावतात जीव तोडून
शेकडो माणसं जातात पैसा अर्ध्यातच सोडून
पैशाचं मोल काय हे तुलाच ठरवायचं आहे
तुझं एकच आयुष्य आहे
काळजी घे || ५ ||

तू वनातील झाड नाहीस
तू तळ्यातील मासा नाहीस
तू वारूळातील मुंगी नाहीस
तू कळपातील हरीण नाहीस
तू थव्यातील पक्षी नाहीस
तुझं स्वत:चं व्यक्तिमत्व आहे
तुझं स्वत:चं अस्तित्व आहे
तुझ्यात विचार करण्याची क्षमता आहे
तुझ्यात निर्णय घेण्याची क्षमता आहे
पॄथ्वीवरील जीवसॄष्टी पुढे नेणं हे तुझं लक्ष्य नव्हे
तुझं जगणं केवळ भक्षक किंवा केवळ भक्ष्य नव्हे

लक्षावधी माणसं आहेत पॄथ्वीतलावर जगणारी
शेकडो माणसं मरतात बनून केवळ आकडेवारी
तुझ्या मरणाचं कुणाला सोयरसुतक नसणार आहे
तू आहेस तोवर ब्रह्मांड आहे
तुझं एकच आयुष्य आहे
काळजी घे || ६ ||