बाळाच्या जन्माची बातमी
ऐकतच राहिलो
नर्स म्हणाली मुलगा वजन
साडेतीन किलो

किलो साडेतीन म्हणजे
पाउंड पावणे आठ
आजीला हे समजावताना
लागली माझी वाट

जन्मापासून बाळाच्या त्या सुरू होतं गणित
आयुष्यात पावलो पावली समोर येतं गणित ॥ १ ॥

तक्त्यावर बाराखडीच्या
खाली होते आकडे
तेव्हापासून आले होते
तुमचे त्यांचे वाकडे

भागाकार गुणाकार आणि
वजाबाकी बेरीज
आयुष्य सुंदर झालं नसतं
का हो ह्यांच्याखेरीज

शाळेमध्ये उगीच मार खायला लावतं गणित
आयुष्यात पावलो पावली समोर येतं गणित ॥ २ ॥

पहिली दुसरी तिसरी चौथी
पाचवी आणि सहावी
आकडेमोड करता करता
आली पाहा दहावी

एसेसीला अभ्यास करणं
एकच होतं मिशन
नव्वद टक्के मिळूनदेखील
हुकलीच ॲडमिशन

स्पर्धेमध्ये आपली जागा दाखवून देतं गणित
आयुष्यात पावलो पावली समोर येतं गणित ॥ ३ ॥

शिक्षण संपलं वाटलं आपलं
गणित आता संपलं
आयुष्याने प्रत्येक वेळी
गणितालाच पण जुंपलं

पगाराच्या गणितात चालत
नाही जरा हयगय
गणितच तुम्हा सांगतं झालंय
लग्न करायचं वय

लग्नाआधी पैशाचं सोडवावं लागतं गणित
आयुष्यात पावलो पावली समोर येतं गणित ॥ ४ ॥

लग्नानंतर ह्या गणिताला
खरा येतो बहर
मिळकत राहते तेवढीच
आणि खर्च करतो कहर

मुलं झाली की गणिताचा
माजतो हाहाकार
खर्चामधली बेरीज संपते
लागतो गुणाकार

अती झालं तर कर्जाच्या वाटेने नेतं गणित
आयुष्यात पावलो पावली समोर येतं गणित ॥ ५ ॥

सोडवत बसलो गणित नाही
विचार केला अन्य
आयुष्याच्या जमाखर्चात
बाकी राहिली शून्य

गणितापायी वर्षं झाली
आयुष्यातून वजा
गणितापायी घेतला नाही
आयुष्याचा मजा

माझ्यासाठी काहीच शिल्लक ठेवत नव्हतं गणित
आयुष्यात पावलो पावली समोर येतं गणित ॥ ६ ॥

आज सकाळी मित्र माझा
परलोकाला गेला
बरंच वय होतं सुटले
मुलगा बोलून गेला

विचार मुलाचे ऐकून आता
वाटे मजला भय
माझ्यापेक्षा कमी होतं
मित्राचं त्या वय

निवॄत्तीनंतर वयाचं नुसतं राहतं गणित
आयुष्यात पावलो पावली समोर येतं गणित ॥ ७ ॥

मग म्हणालो भीती कसली
डोळे उघडून बघ
दुसऱ्यांसाठी खूप जगलास
स्वत:साठी जग

कोण सांगू शकेल आपलं
आयुष्य बाकी किती
आयुष्य आहे ओंजळ वाळू
होते भरभर रिती

माझ्यापुरतं आयुष्याचं सुटलं होतं गणित
आयुष्यात पावलो पावली समोर येतं गणित ॥ ८ ॥