सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||

पहिली मूळ संख्या म्हणूनी
अंक येतो दोन
अनेकवचनी ह्याच्यापेक्षा
लहान आहे कोण || २.१ ||

सम संख्यामालेतील आहे
हे तर शेंडेफळ
संगणकाच्या भाषांमध्ये
पाया हाच अढळ || २.२ ||

नर नारी अन् वार्इट चांगलंं
कॄष्ण असो वा श्वेत
ब्रह्मांडाच्या प्रत्येक बाबीत
दाखवतो हा द्वैत || २.३ ||

आवाजाची दिशा समजण्या
असती दोन कान
दोन डोळे पाहून देती
अंतराची जाण || २.४ ||

दोन हाती काम करण्या
नेती दोन पाय
त्यांच्याशिवाय उदरनिर्वाह
चालेल आपला काय || २.५ ||

उंच भरारी गगनी घेण्या असती दोन पंख
पाहता उघडून डोळे दिसती जागोजागी अंक || २ ||

सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||

पहिली मूळ विषम संख्या
आहे ही तर तीन
गुणवत्तेची ह्याच्याखाली
पत नसे आणखीन || ३.१ ||

तीन जर का बेरीज झाली
साऱ्या अंकांची
नि:शेष वाटणी संख्येची
त्या तीन भागांची || ३.२ ||

ब्रह्मांडाचे तीन लोक
स्वर्ग धरा पाताळ
ब्रह्मा विष्णु महेश तिघेजण
करती देखभाल || ३.३ ||

तेरड्याचा तो रंग राहतो
फक्त तीन दिवस
तीन पानं असतील तरच
ओळखू येई पळस || ३.४ ||

हॅटट्रिक सलग तीन गडी जर
बाद केले तर
देवही देतो तपानंतर
मोजून तीनच वर || ३.५ ||

परक्या आक्रमकांना तिन्ही सेना देती डंख
पाहता उघडून डोळे दिसती जागोजागी अंक || ३ ||

सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||

दोनाचा जर वर्ग केला
तर मग येतो चार
पदार्थांना स्थैर्य देण्यास
उपयोग ह्याचा फार || ४.१ ||

अंतिम दोन अंकांना जर
चार भागेल नि:शेष
तर पूर्ण संख्येमध्येसुद्धा
रहाणार नाही शेष || ४.२ ||

चार चाकं चार पाय
स्थैर्य ते देती
विज्ञानात चौथी आहे
समयाची मिती || ४.३ ||

चार आश्रमी जीवन जावे
सांगती चार वेद
वापर चार उपाय साम
दाम दंड भेद || ४.४ ||

पूर्व पश्चिम उत्तर दक्षिण
मुख्य चार दिशा
चौकामध्ये मिळून येती
वाटा चार अशा || ४.५ ||

क्रिकेटमध्ये चौका मारून धावू नये नि:शंक
पाहता उघडून डोळे दिसती जागोजागी अंक || ४ ||

सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||

अंकावलीत मध्यभागी
येतो अंक पाच
सर्व अंकांमध्ये सर्वात
सोपा अंक हाच || ५.१ ||

संख्येमध्ये शेवटी आले
पाच किंवा शून्य
पाचाने मग भाग जातो
गणित सर्वां मान्य || ५.२ ||

पाच असतात बोटं जरी
सारखी नसली तरी
पाच पांडव शंभर कौरवांना
पडले भारी || ५.३ ||

पंचमहाभूतं सारी
सृष्टी चालवत आली
पंचज्ञानेंद्रियांनी ही
जाणीव आपणा दिली || ५.४ ||

मंत्र्यांनाही साऱ्या सुविधा
पंचतारांकित
पंचवार्षिक योजना ते
बसतात मग बनवीत || ५.५ ||

पंचांमृताशिवाय पूजेत वाजत नाही शंख
पाहता उघडून डोळे दिसती जागोजागी अंक || ५ ||

सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||

एक दोन आणि तीनची बेरीज
अंक येतो सहा
एक दोन तीनचा गुणाकारही
हाच येतो पहा || ६.१ ||

सम संख्या जर पूर्ण भागली
जाते तीनाने
तर ती संख्या भागली जाते
निश्चित सहाने || ६.२ ||

हेमंत शिशिर वसंत ग्रिष्म
वर्षा आणि शरद
वर्षभराचे गाणे म्हणजे
सहा ऋतूंचे पद || ६.३ ||

काम लोभ क्रोध मद
मोह आणि मत्सर
सहा शत्रू ते मानवाचे
मनात करती घर || ६.४ ||

सीमेपार चेंडू जाता
देर्इ सहा धावा
सहामाही परीक्षेकरता
देवाचाच धावा || ६.५ ||

सहावी जाणीव जेव्हा येते मनास करते थक्क
पाहता उघडून डोळे दिसती जागोजागी अंक || ६ ||

सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||

सर्वात मोठा मूळ अंक तो
म्हणून येतो सात
पाढा ह्याचा आला नाही
करील तुमचा घात || ७.१ ||

सप्तपदीची सात पाऊले
सहचर ठरवून देती
सप्ताहाचे सात दिवस ते
अव्याहत बघ येती || ७.२ ||

सात सुरांच्या सजावटीने
मंत्रमुग्ध मनुष्य
सात रंग ते सजवून जाती
नभीचे इंद्रधनुष्य || ७.३ ||

सात आश्चर्यं जगात असती
भव्य दिव्य अपार
दिसतील तुम्हा जाऊन तेथे
सात समुद्रापार || ७.४ ||

सप्तर्षींनी भारतवर्ष
केले समॄद्ध
सात बुटके सेवेसी
हिमगौरी बेशुद्ध || ७.५ ||

सात वीर दौडले होता शिवबा साशंक
पाहता उघडून डोळे दिसती जागोजागी अंक || ७ ||

सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||

दोनाचा घन केला असता
मिळतो अंक आठ
मोजून होता दिशा उपदिशा
पडेल ह्याची गाठ || ८.१ ||

अंतिम तीन अंकांना जर
आठ भागत असेल
तर पूर्ण संख्येमध्येसुद्धा
बाकी काही नसेल || ८.२ ||

आठ ग्रहांनी रिंगण केले
सूर्याभोवती सतत
आठच घोडे ओढून नेती
सूर्याचा तो रथ || ८.३ ||

अष्टविनायक प्रत्येकाच्या
असती श्रद्धास्थानी
अनेक क्रिया करतो त्याला
म्हणा अष्टावधानी || ८.४ ||

शिवशाही चालवण्या करती
सहाय्य अष्टप्रधान
आठच प्यादी बुद्धीबळातील
लढती विसरून भान || ८.५ ||

अष्टांगाचे संगोपन हा प्रत्येकाचा हक्क
पाहता उघडून डोळेसती जागोजागी अंक || ८ ||

सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||

किंमत ज्याची सर्वोच्च असे
अंक असा हा नऊ
अंकावलीच्या भावंडांतला
सगळ्यात मोठा भाऊ || ९.१ ||

अंकांच्या बेरजेला नऊ
भागत असेल नक्की
तर त्या संख्येस नऊ भागेल
गोष्ट आहे पक्की || ९.२ ||

शॄंगाराच्या अलंकारांत
नवरत्नांचा भार
नवरत्नांनीच भरला होता
मुघलांचा दरबार || ९.३ ||

तरूण युगुलं गिरक्या घेती
भाद्रपदी नवरात्री
गोंगाटाने प्रौढांच्या मग
नाकी नऊ येती || ९.४ ||

शृंगार करूण भयानक शांत
अद्भुत आणि बिभत्स
करूण वीर हास्य
झाले पहा ते नवरस || ९.५ ||

नऊ महिने भार सोसूनी होर्इ मग बाळंत
पाहता उघडून डोळे दिसती जागोजागी अंक || ९ ||

सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||

अंकांमधला अंक वेगळा
शेवटचा तो शून्य
किंमत नाही ह्याला तरीही
तुलना नाही अन्य || १०.१ ||

शून्य अंक हा असा असे जो
धनं नाही की ऋणं
वाढत नाही काही ह्याने
होत नाही उणं || १०.२ ||

दिसतो जरी तो साधा भोळा
आहे फारच गहन
बाकी अंकांपुढती लावा
वाढत जार्इ वजन || १०.३ ||

शून्याने ह्या गुणा कुणाला
उत्तर शून्यच येतं
शून्यामध्ये भागा काही
होतील भाग अनंत || १०.४ ||

शून्याच्या ह्या सामर्थ्याने
विकसित हो विज्ञान
शून्याच्या पायावर आधारित
अन् तत्त्वज्ञान || १०.५ ||

शून्यच माझा आदि आणि शून्यच माझा अंत
पाहता उघडून डोळे दिसती जागोजागी अंक || १० ||

सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||

प्राचीन काळी मानव जेव्हा
बोटे मोडत होते
दशमानाची पद्धत आली
दहाच होती बोटे || ११.१ ||

भारतवर्षी शून्य शोधले
गणिती झाली क्रांती
नगण्य वाटे शोध तरीही
जगभर झाली ख्याती || ११.२ ||

शून्यामुळेच प्रगती झाली
ऋण संख्याही आली
शून्याहूनही खाली जाता
येते ज्ञाती झाली || ११.३ ||

अपुर्णांकही आले नंतर
घडले आश्चर्य
गणिताचे मग शास्त्रज्ञांना
कळले सामर्थ्य || ११.४ ||

पैसे अंतर वजन आकार
असो कालमापन
अंकांचा सहवास नाही
टाळू शकत आपण || ११.५ ||

एके दिवशी नावे आपली जाऊन येतील अंक
पाहता उघडून डोळे दिसती जागोजागी अंक || ११ ||

सान थोर नर नारी आणि राव असो वा रंक
पाहता उघडून डोळे दिसती जागोजागी अंक || धृ ||