माझा विचार आहे पक्का
आरोग्याचा हुकमी एक्का
त्यावर बसणार आहे शिक्का

पाचाचा लावूनी गजर
उद्या उठणार मी लवकर || १ ||

सगळे म्हणती दाखवून बोट
तुझं सुटलं आहे पोट
त्यांच्या बोलण्यात नाही खोट

चालीन चांगला मी भरभर
उद्या उठणार मी लवकर || २ ||

माझा रिपोर्ट काढला आहे
रक्तदाब वाढला आहे
त्यावर उपाय ताडला आहे

चक्रावून जातील डॉक्टर
उद्या उठणार मी लवकर || ३ ||

विझतसे एक एक तारा
सकाळीचा गार गार वारा
प्रदूषणास नाही थारा

जार्इन तेव्हा मी दूरवर
उद्या उठणार मी लवकर || ४ ||

गोष्ट चांगली नाही वाद
देर्इ शरीराला अल्हाद
जागे मनातही उन्माद

चालण्याचा चढे मला ज्वर
उद्या उठणार मी लवकर || ५ ||

पत्नी म्हणे भारी कल्पना
रोज रोज तुझ्या वल्गना
नको सांगू गप्पा जना

तिला दाखवीन खरोखर
उद्या उठणार मी लवकर || ६ ||

कालसुद्धा होतो उठणार
गजरही लावले होते चार
म्हटलं झोपू थोडंफार

परंतु झोपलो तासभर
उद्या उठणार मी लवकर || ७ ||

आज थंडी होती भारी
स्वप्नात नाचतसे शृंगारी
गजराच्या तालावर नारी

पाहता उलटून जार्इ प्रहर
उद्या उठणार मी लवकर || ८ ||

कुणी निंदा किंवा वंदा
बारीक होणार मी तर यंदा
आहे निश्चय माझा खंदा

येवो प्रलयही बेहत्तर
उद्या उठणार मी लवकर || ९ ||

नाही वायफळ माझा टॉक
जरी बसे कुणाला शॉक
घेणार आहे मॉर्निंग वॉक

तुम्हा वाटेल मग मत्सर
उद्या उठणार मी लवकर || १० ||